Deputeti i Partisë Demokratike, Edmond Spaho, ka treguar skenaret e tjerë për përshkallëzimin e protestave të opozitës për largimin e kryeministrit Edi Rama nga pushteti.
Në një intervistë për “Panorama TV”, Spaho deklaroi se një skenar është bllokimi i rrugëve kryesore nga ana e qytetarëve.
Deputeti demokrat shtoi se një tjetër aspekt i mosbindjes civile është mospagimi i taksave nga qytetarët, duke detyruar kreun e qeverisë që të tërhiqet.
Spaho tha se përmbysja e regjimit të kryeministrit Rama kërkon kohë, ndaj është i nevojshëm edhe përshkallëzimi i protestave.
Edmond Spaho: Edhe me iniciativën e grupit të Alibeajt, pavarësisht premtimeve që kishte marrë nga mazhoranca nuk prodhoi ndonjë rezultat. Dyshoj që deri në zgjedhjet e 14 majit, do kemi ndonjë produkt për zgjedhjet. Reforma do zvarritet deri në zgjedhjet e përgjithshme. Mazhoranca nuk ka vullnet të bashkëpunojë me grupin tonë, pavarësisht se jemi shumicë dërrmuese. I takon këtij grupimi, ndërkohë që jemi përjashtuar nga të gjitha komisionet parlamentare. Reforma zgjedhore kërkon miratimin e të gjitha palëve që të vihet në zbatim. Kjo nuk ka ndodhur. Ne do vazhdojmë të insistojmë, nisur edhe nga fakti që OSBE ka ngritur shqetësimet. Madje i është referuar grupimit tonë të opozitës. Ne do vazhdojmë të përdorim gjithë rrugët dhe kontaktet që të bëjmë të mundur që procesi i reformës zgjedhore të shkojë deri në fund.
Këtu çështja nuk ka të bëjë vetëm me këtë reform zgjedhore. Prapë zgjedhjet janë karakterizuar nga ndërhyrjet, manipulimet, përdorimet e rrugëve të jashtëligjshme. Një nga ato është përdorimi i administratës publike. E keni parë se çfarë bëhet me patronazhistët. Platforma e re e Aktivistit. Përdoret edhe fondi i ndihmës ekonomike, punësimi me paga të pjesshme. Kalimi i numrit të punësimeve në çdo institucion. Vetëm për të garantuar votimin pro PS-së. Pa përmendur mjetet ilegale për të krimit. Mjaft rrugë dhe mjete të tjera me të cilat Rama kërkon të mbesë patjetër në pushtet.
Ada Hazizolli: Duhet të jetë e vështirë mbrojtja e votës. Si do e mbrojë PD-ja votën?
Spaho: Me Ramën është shumë e vështirë të ketë zgjedhje të ndershme. Këtë e ka vërtetuar që kur ishte kryebashkiak i Tiranës. Prandaj kemi nisur këtë cikël protestash, me synim për të larguar Ramën. Skandali i fundit i ka vendosur kapakun. Ka treguar që ky ble politikanët, zyrtarë shumë të rëndësishëm të SHBA-së, Brukselit. Është në natyrën e tij që të mbajë pushtetin përmes këtyre mekanizmave. Fokusi do jetë për ta larguar.
Ada Hazizolli: Në mbledhjen e zhvilluar pak më parë, Berisha tha që ky regjim nuk largohet me votë, por me revolucion. Si duhet ta lexojmë?
Spaho: Ka ardhur koha për të kaluar në mosbindje civile. Qytetarët të bllokojnë rrugët e Shqipërisë, të bllokojnë mosfunksionimin ekonomik. Mosbindje civile do të thotë të mos paguash taksat. Ne do vazhdojmë me protesta kombëtare, protesta në Parlament. Do vazhdojmë ta bllokojmë seancën plenare. Do të diskutojmë, do mendojmë dhe do vëmë në zbatim dhe forma të tjera si bllokimet e rrugëve, dhe kalimin në format e tjera siç është mospagimi i taksave.
Patjetër njerëzit duan të shohin rezultat, por përmbysja e këtij regjimi të Edi Ramës kërkon kohë. S’është gjë e thjesht, do duhet edhe qëndresë, bashkim. Duhet të kuptohet jo si një betejë për të rikthyer PD-në në pushtet, por për të ruajtur demokracinë. Rama po kthehet në autokrat. Nëse kjo betejë nuk vazhdon, vështirë që rezultati të jetë i shpejtë. Mënyra se si ekspozohet nga mediat kjo betejë, nuk është ajo që i duhet dhënë qytetarëve. Më shumë fokusohen tek problemet e opozitës, që opozita nuk mobilizon dot.
Kush do jetë ai segment përveç opozitës që t’i përgjigjet. Opozita dhe sot ka probleme dhe do duhet që t’i përmirësojë. Por e keqja që kemi përballë është shumë herë më e madhe. Opozita motivon dhe shumë madje, por është e domosdoshme që edhe të tjerët t’i bashkohen kësaj lëvizje. Ka plot nga shoqëria civile, nga media, nga analistë të ndryshëm që duhet t’i bashkohen. Po bëhet fjalë për zhdukjen e pluralizmit dhe demokracisë.
Duke u ndalur tek çështja “McGonigal”, Spaho thotë se është i nevojshëm një hetim qoftë edhe parlamentar, për të zbuluar nëse kryeministri Rama ka përdorur para publike për të eleminuar opozitën.
Spaho: Ne duam të hetojmë se si kryeministri shqiptar ka përdorur paratë publike për të eleminuar opozitën shqiptare. Duam të hetojmë se si kryeministri i ka hapur rrugën investimeve ruse në vend. Licenca për ndërtimin e komplekseve bujqësore, për shpimet e naftës. Në SHBA nuk i ka për t’i kushtuar vëmendje, sidomos nga FBI-ja, problemeve të Shqipërisë. Ka për të parë gjithmonë dëmin e FBI-së.
