Çështja “McGonigal” vijon të jetë kryefjalë në mediat amerikane. Këtë të Premte është revista prestigjioze “Rolling Stone” që i kushton artikullin kryesor “njeriut misterioz”.
“Rolling Stone” shkruan kryesisht për dosjen e Nju Jork në ngarkim të ish-agjentit special të kundërzbulimit të FBI-së, megjithatë artikulli flet edhe për akt-akuzën e Uashingtonit, në të cilën përmendet dhe kryeministri Edi Rama.
Marrjen e 80 mijë dollarëve nga Agron Neza, “Rolling Stone” e cilëson të një “stili bandit”.
Ndërkohë, kryeministri Edi Rama ka artikuluar (hera e fundit ishte dje në një emision televiziv) se bëhet fjalë për një borxh mes Agron Nezës dhe Charles Mcgonigal.
“Çfarë thotë akuza aty? Në fund akuza thotë se ish zyrtari i lartë i FBI-së nuk ka raportuar udhëtimet dhe ka marrë para borxh… Ti më pyet mua pse i ka dhënë borxh Agron Neza, Charles-it”, do të shprehej një ditë më parë në emisionin “Opinion” kryeministri Edi Rama, duke mohuar se paratë që Mori Mcgonigal nga Neza ishin për të iniciuar hetimin në SHBA ndaj lobistit të PD-së, Nik Muzin.
Megjithatë, “Rolling Stone”, në raportimin që i referohet akt-padive zyrtare dhe njerëzve që e njohin mirë FBI-në, e cilëson marrjen e parave më 5 tetor 2017 të një “stili bandash”.
“I arrestuar muajin e kaluar, McGonigal përballet me akuza federale në Nju Jork për shkelje të ligjeve federale të sanksioneve që e ndalonin atë të merrte para nga Deripaska dhe të pastronte ato fitime të marra në mënyrë të paligjshme. Ai akuzohet gjithashtu në një çështje të veçantë të ngritur në Uashington DC, për pranimin e gati një çerek milion dollarësh në pagesa sekrete nga një ish-oficer i inteligjencës shqiptare, duke përfshirë 80,000 dollarë që iu dorëzuan në një stil bandash në një makinë të parkuar jashtë një restoranti në Nju Jork”, shkruan revista amerikane.
Më tej në raportim ngrihen pikëpyetje nëse Charles Mcgonigal është ‘baltosur’ më shumë sesa çka akuzohet zyrtarisht deri në tani.
“A e komprometuan shërbimet e sigurisë ruse një agjent të lartë kundërzbulimi të FBI-së, në Amerikë? Si u kap kaq lehtë një nga spiunët kryesorë të FBI-së? Dhe sa e ekspozuar është FBI-ja, duke pasur parasysh se ishte Fokin (Evgeny Fokin), një spiun i dyshuar rus, ai që e futi në kurth”, janë pikëpyetjet që ngre “Rolling Stone”.
