“Janë kazanë”. Ky ishte argumenti i kryeministrit Edi Rama në përgjigje të raportimeve të mediave më me influencë në Amerikë (CNN, New York Times, Washington Post) për lidhjet e tij me ish-shefin e FBI-së, Charles McGonigal.
“New York Post është gazeta e falimentuar e Nju Jorkut është tabloid zotëri! Unë s’merrem me tabloide. Ato janë kazanë të llojit të tyre. Ajo Washington Examiner është kazan i njohur. New York Times dhe Washington Post e referojnë me korrektësi duke i referuar te aktakuzat. Më përmendein se jam kryeministër i Shqipërisë, se emri im figuron në narrativën e akt-akuzës”, tha Rama.
Kryeministroi e mohoi kategorikisht se ai ka korruptuar Charles McGonigal, duke thënë se nuk i është marrë asnjë dëshmi për këtë çështje dhe se grand-juria në SHBA nuk ka kërkuar asnjë informacion për të.
“Në akt-akuzë nuk ka as korrupsion, nuk ka as blerje, nuk ka as shitje në aktakuzë ka vetëm që ky njeriu nuk ka deklaruar disa udhëtime që ka bërë që është problemi i tij, puna e tij që nuk kam lidhje unë fare dhe që ky njeriu ka marrë para borxh në konflikt interesi me atë tjetrin. Pra nuk flitet për asgjë tjetër. Gjithë këto të tjerat janë vetëgjyqësia shqiptare. Gjithë përmendjet janë kontekstuale“, u shpreh Rama.
Ai gjithashtu ironizoi deklaratat e kreut të PD-së Sali Berisha se zotëron video erotike të ish-shefit të FBI-së dhe ministrave të tij në club-e nate në Tiranë.
“Sikur Amerika të lobojë kështu, po të them që do ishte bërë leckë për të fshirë këmbët planeti. Po mo influenca, po me çfarë, me piktura apo me video erotike. Shqipëria paska potencial që me para, me eros, me piktura ta marrë Amerikën për hunde dhe DASH, CIA, FBI të punojnë për të. Ku ka Zot në tokë që e blen Amerikën, nuk ekziston“, deklaroi kryeministri.
Të njëjtin qëndrim Rama mbajti edhe për akuzat e Berishës se McGonigal ka ndërhyrë në procesin e vetingut për llogari të mazhorancës.
“Ka ndërhyrë Mcgonigal për Vetingun? Ç’punë kishte”, tha shefi i qeverisë.
Ndër të tjera Rama mohoi denoncimet e kreut të selisë blu se ai dhe McGonigal kanë ndikuar në shpalljen non grata të Sali Berishës, por edhe kanë pasur një strategji të qartë lobimi për të asgjësuar Partinë Demokratike.
Për Charles Mcgonigal tha se “s’ka kërkuar asgjë nga unë”. Por sa i përket dhuratave që ka marrë nga ish-zyrtari i FBI, Rama u shpreh: “Ajo fjala që përdoret aty përdoret për kapele. Më dha një kapele të FBI”.
