Thirrjet e Sali Berishës për ta ndjekur Edi Ramën deri te shtëpia në Surrel nëqoftë se kryeministri nuk del të japë llogari për përfshirjen në aferën McGonigal, kur thirret nga opozita në Kuvend, duket se mbështetësit demokratë e kanë marrë shumë seriozisht.
Disa qytetarë dhe dhjetëra të rinj të FRPD-së pasi kanë parë njoftimin se kryeministri do të jetë i ftuar në emisionin “Opinion” të gazetarit Blendi Fevziu, duke nisur nga ora 21:00 janë përpjekur të bllokojnë rrugën hyrëse për në televizionin “Klan”.
Dhjetëra forca policie ndodhen pranë tyre dhe po tentojnë të shpërndarjnë turmën, por në një video nga vendngjarja mbështetësit dëgjohen të thonë: “Nuk ka shanse me lëviz”.
“Nuk lëviz unë more. Çfarë ligji po shkelim ne. Ja po rrimë këtu dhe po bëjmë muhabet me njëri-tjetrin. Çfarë ligji po shkelim ne? Kemi respekt, por na lini edhe ne në punën tonë, nuk po bëjmë as zhurmë dhe asgjë”, dëgjohet të thotë një nga protestuesit në videon e postuar nga faqja e emisionit në rrjetet sociale.
“Problemi nuk është vetëm se duhet të protestojmë ne. Duhet të bashkohen edhe të tjerë me ne. Rinia është duke braktisur vendin dhe nuk e sheh më shpresën te Rama. Është kryeministri më i keq që ka qeverisë Shqipërinë. E ka shitur Shqipërinë dhe ka bërë planet e veta. Shqiptarët po kërkojnë azile politike dhe një rrogë të mirë. Rama nuk ka fuqi të ballafaqohet me qytetarët e vet”, u shpreh një tjetër.
Siç duket edhe nga pamjet, të rinjtë e FRPD-së janë grumbulluar në trotuarin para hyrjes së televizionit, ndërkohë që uniformat blu kanë krijuar edhe një kordon sigurie.
Të rinjtë thanë se do vazhdojnë të protestojnë kundër Ramës dhe duket se ia kanë prishur qetësinë kryeministrit, pasi si asnjëherë më parë, Rama i ka shmangur duke u futur nga dera e pasme për në studion e Opinion.
