Çështja McGonigal vijon të jetë në vëmendje të mediave amerikane, ndërsa këtë të Enjte është “New York Post” që shkruan për lidhjet e ish-shefit të FBI-së me djalin e Presidentit amerikan Biden.
Në vëmendje sillen edhe akuzat ndaj ish-shefit të FBI-së për “marrjen e parave nga një ish-oficer i inteligjencës shqiptare dhe takimet sekrete me kryeministrin shqiptar Edi Rama”.
‘Pse po paguanin shqiptarët McGonigal”, ngre pyetjen Miranda Devina në opinionin e titulluar “lidhja e Hunter Biden me ish-zyrtarin e turpëruar të FBI-së, Charles McGonigal”.
“Sipas Belind Këlliçit, kandidati i Partisë Demokratike të opozitës për zgjedhjet e majit për kryetar bashkie në Tiranë, Shqipëri, McGonigal hapi hetime të FBI-së për kundërshtarët politikë të kryeministrit të Partisë Socialiste Shqiptare Rama, hetime të përdorura për t’i shpallur ata persona non grata, tu pengonte bërjen biznes ose hapjen e një llogarie bankare në SHBA”, thuhet në artikull.
Më tej, nën nëntitullin “lista e zezë e McGonigal”, autorja shkruan se “rreth një duzinë politikanë të opozitës ose njerëz të biznesit që mbështesin partinë opozitare u shtuan në ‘listën e zezë’ të McGonigal”.
“Këtu përfshihej edhe Sali Berisha, i cili u godit me statusin persona non grata dhe iu ndalua të udhëtonte në SHBA nga Sekretari i Shtetit Antony Blinken. Fundjavën e kaluar, skandali i McGonigal luajti një rol kryesor në një protestë antiqeveritare në Shqipëri përpara ndërtesës kryesore të qeverisë, ku kërkohej dorëheqja e kryeministrit të akuzuar për korrupsion për shkak të takimeve të tij me McGonigal. Pankartat me emrin e ish-agjentit të FBI-së ishin të kudogjendura”, thuhet më tej në artikull.
