“Një situatë që konsiderohet si një pengesë e mundshme për aspiratat e gjata të vendit për t’u anëtarësuar në BE”.
Kështu e konsideron media e njohur kanadezo-amerikane VICE në një artikull të zgjeruar “kontrollin” që bandat e krimit të organizuar kishin mbi policinë dhe rivalët në qytete të ndryshme të Shqipërisë, duke përdorur disa qindra kamera CCTV, të vendosura në pika kyçe hyrëse dhe dalëse.
Çcmontimi i tyre nga policia, që nisi pasi hedhja në erë me tritol e mjeteve apo banesave të efektivëve të policisë në Shkodër dhe shefave të tyre u kthye në “trend” e që u shit si një sukses nga autoritetet dhe Ministria e Brendshme, në të vërtetë sipas VICE tregon se krimi ishte kthyer në rrezik për vetë shtetin.
VICE thekson gjithashtu se kamerat përdoreshin nga distanca për të monitoruar lëvizjet e policisë, operativëve të bandave dhe grupeve rivale, si dhe për operacionet policore.
ARTIKULLI:
Një fushatë “hedhjesh në erë” me tritol që synonte zyrtarët e policisë në një qytet verior të Shqipërisë çoi në zbulimin e qindra kamerave CCTV të montuara ilegalisht, të cilat qeveria pretendon se operohen nga klanet mafioze lokale.
Policia zbuloi një rrjet kamerash të lidhura dhe të përdorura nga bandat e dyshuara se ishin përfshirë në një sulm me tritol, në shtëpinë e një personazhi të profilit të lartë si shefi i policisë rajonale.
Lëndët plasëse u shpërthyen jashtë rezidencës së Pëllumb Shpatit, shefit të policisë në qytetin veriperëndimor të Shkodrës, në orët e para të mëngjesit të 13 janarit. Një grup i posaçëm hetimor u ngrit për të gjetur se kush e orkestroi sulmin, megjithëse ende nuk është bërë asnjë arrestim.
Policia gjeti 59 kamera CCTV vetëm në Shkodër. Kjo bëri që autoritetet në të gjithë vendin të kapnin më shumë se 500 kamera. Shumica ishin të lidhura me celularë dhe u gjetën në Tiranë, kryeqyteti shqiptar, sipas policisë kombëtare.
Kamerat u përdorën nga distanca për të monitoruar lëvizjet e policisë, operativëve të grupeve dhe bandave rivale, si dhe operacionet e policisë.
“Policia çmontoi…kamerat e vendosura në shtylla elektrike dhe në rrugë, për të mbledhur informacion për qëllime kriminale”, njoftoi policia shqiptare në një deklaratë të martën përmes Financial Times.
Kamerat e vendosura nga persona apo grupe kriminale kishin për qëllim edhe marrjen e informacionit për lëvizjet e policisë.
Ngritja e mbikëqyrjes rrugore me CCTV është një taktikë që është përdorur nga komuniteti i rëndësishëm i krimit të organizuar në Shqipëri për të monitoruar zbatimin e ligjit dhe për të siguruar zonat e kontrollit të tyre për disa vite.
“Krimi i organizuar në Shqipëri ka arritur nivele të larta sofistikimi dhe kamuflimi”, tha për VICE World Neës Rudina Hajdari, kryetare e Komitetit të Integrimit në BE të Shqipërisë dhe ish-deputete.
“Ajo që u bë publike me sistemin e kamerave [të përdorur nga gangsterët] ka ekzistuar për një kohë të gjatë, por policia mbylli një sy [për të] sepse shumica e grupeve kriminale kanë lidhje të ngushta me qeverinë… [nëpërmjet] pastrimit të parave përmes ndërtimit apo forma të ndryshme investimi”, tha Hajdari.
Rasti ekspozon më tej kontrollin që grupet e krimit të organizuar kanë në vendin e vogël.
Hajdari tha se marrëdhënia midis zyrtarëve qeveritarë dhe grupeve të krimit të organizuar kërcënon sistemin politik demokratik në zhvillim të vendit ballkanik për shkak të kërcënimeve dhe frikësimeve në rritje ndaj kritikëve.
“Kamerat janë vetëm një aspekt, por kontrolli që krimi i organizuar ka mbi procesin politik sot po kërcënon demokracinë tonë të brishtë”, tha Hajdari. “Organizatat kriminale ndihmojnë…në proceset zgjedhore financojnë fushatat politike,” tha ajo, si dhe kërcënoi figurat e opozitës në emër të zyrtarëve të korruptuar dhe patronëve të tyre mafioz.
Mafiat shqiptare kontrollojnë pjesën më të madhe të tregtisë së kanabisit dhe heroinës në Evropë, sipas raporteve të BE-së, si dhe luajnë një rol të rëndësishëm në kontrabandën e kokainës nga Amerika e Jugut në Evropë dhe në shitjen e saj në Mbretërinë e Bashkuar. Zakonisht të organizuara rreth klaneve dhe grupeve familjare, ato lidhin vendin me një diasporë të madhe shqiptare në të gjithë Evropën Perëndimore, një situatë që konsiderohet si një pengesë e mundshme për aspiratat e gjata të vendit për t’u anëtarësuar në BE.
Pas kapjes së kamerave CCTV, kryeministri shqiptar Edi Rama tha: “Fakti që policia veproi për këtë çështje, problem prej dekadash, do të thotë se qeveria është e prirur dhe e fokusuar në luftimin e krimit të organizuar”.
Burimi: VICE /Përshtati: Boldnews.al
