Një tërmet prej 5.7 ballësh ka goditur Rumaninë të martën, njofton Qendra Sizmologjike Mesdhetare Evropiane. Tërmeti kishte epiqendrën 73 kilometra në verilindje të Drobeta-Turnu Severin.
Thellësia e tërmetit ishte 10 kilometra nga sipërfaqja e tokës. Dridhje të tokës nga ky tërmet janë ndier edhe në Kosovë dhe Serbi.
Shemsi Mustafa, kreu i rrjetit sizmologjik të Kosovës, kërkoi që të mos shkaktohet panik te qytetarët, pasi Kosova nuk u godit nga tërmeti.
“Tërmeti ka goditur në Rumani, por për shkak të fuqisë dhe energjisë së liruar dhe përhapjes nëpërmjet valëve sizmike, kap distancë deri 500 kilometra”, shkroi ai në Facebook.
Njoftimi për dridhje të tokës në Rumani, vijnë në kohën kur Turqia dhe Siria po përballen me pasojat e tërmeteve shkatërruese të 6 shkurtit që kanë marrë jetën e mbi 35.000 personave.
