Ka reaguar zyrtarisht policia e Korçës pas videos të publikuar në media ku një efektiv policie shfaqet duke dhunuar një qytetar në ambientet e brendshme të një pallati.
Oficeri i policisë i identifikuar si Gjergji Riza, është pezulluar nga detyra dhe është kërkuar hetim disiplinor ndaj tij për ngjarjen e ndodhur pak ditë më parë në qytetin e Pogradecit.
Sipas policisë, efektivi Gjergji Riza ka dhunuar qytetarin duke e “justifikuar” aktin e tij të dhunës me pretendimin se më datën 22 janar “Ervin Norolla gjatë natës, kishte tentuar të digjte klinikën e bashkëshortes së punonjësit të Policisë”. Mesaduket ky është një nga ato raste ku efektivi i policisë Gjergji Riza ka menduar të hakmerret në mënyrë personale dhe të ushtorjë dhunë ndaj 35-vjeçarit.
Reagim i Drejtorisë Vendore të Policisë Korçë:
“Në lidhje me një video të publikuar në media, në të cilën shfaqet një shtetas që ushtron dhunë fizike ndaj një shtetasi tjetër, në korridorin e një pallati, dhe pas verifikimeve rezultoi se shtetasi që ka ushtruar dhunë është punonjës policie në Drejtorinë Vendore të Policisë Korçë, ju sqarojmë se:
Drejtori i Drejtorisë Vendore të Policisë Korçë ka pezulluar menjëherë nga detyra, punonjësin e Policisë, nënkomisar Gj. R., me detyrë specialist në Sektorin e Analizës Strategjike, Planifikimit, Monitorimit dhe Vlerësimit, në DVP Korçë.
Ndërkohë, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale në Policinë e Shtetit, për nisjen e menjëhershme të hetimit disiplinor, për këtë punonjës policie, për shkelje të rëndë.
Nga verifikimet paraprake rezulton se ngjarja ka ndodhur në korridorin e një pallati, në Pogradec, gjatë muajit janar të këtij viti, për shkak se shtetasi i dhunuar K. N. dyshohej se më datë 22.01.2023, gjatë natës, kishte tentuar të digjte klinikën e bashkëshortes së punonjësit të Policisë Gj. R.
Po nga verifikimet rezulton se shtetasi K. N., 35 vjeç, banues në Pogradec, është arrestuar më datë 07.02.2023, në kuadër të operacionit policor antidrogë të koduar “Pasagjeri”, për veprimtarinë kriminale të shitjes së drogave të forta.”, njofton policia.
