Kryedemokrati Sali Berisha ka mbledhur sot Kryesinë e PD për të diskutuar hapat e radhës që do të ndiqen për “revolucionin” demokratik që ai ka paralajmëruar e që do të vazhdojë deri në dorëheqjen e kryeministrit Edi Rama.
Nga selia blu, Berisha e nisi fjalën e tij duke e akuzuar Ramës si “porositës të krimit më të shëmtuar ndaj demokracisë dhe pluralizmit, asgjësimit të pluralizmit de facto”.
“Largohet vetëm me revolucion”, theksoi ai teksa vijoi të argumentonte se Shqipëria është vendi i qytetarëve, që vidhen në mënyrën më monstruoze.
“E thirrëm këtë mbledhje për të diskutuar rreth situatës aktuale, politike dhe elektorale në vend. McGonigal, që vazhdon të jetë kryefjalë e medieve botërore, është në burg, kurse porositësi i vrasjes me pagesë të opozitës shqiptare, është në pushtet. Cilido që mendon se ky porositës i krimit më të shëmtuar ndaj demokracisë dhe pluralizmit, asgjësimit të pluralizmit de facto, largohet me votën e lirë, gabon. Është iluziv, gënjen veten. Kjo është e vërteta. Sepse, Shqipëria, një vend anëtar i NATO-s, ka degraduar në shkallën më ekstreme. Në Europë është narkoshteti i parë dhe i vetëm. Do të thotë se vendos mafia e drogës”, tha Berisha.
Duke u ndalur te vjedhjet e qeverisë, lideri i opozitës theksoi se mjafton të shohësh se Greqia po ndërton me 4.5 milionë euro kilometri, autostradën Kakavijë-Janinë, ndërsa në Shqipëri qeveria e nis me 22 milionë euro kilometri ndërtimin e autostradës Limuth-Rrogozhinë.
Sa i përket fatit të revolucionit që sipas tij PD ka nisur, Berisha tha se do të vijojë me komunikime me qytetarët dhe kontakte direkte për të kuptuar hallet dhe problemet e tyre.
“Gjithçka, fati i këtij revolucioni varet nga komunikimi ynë me intensiv me qytetarët. Jo nëpërmjet ekraneve. Komunikimi është i akullt. Do të përdorim ekranet, pro kontaktet direkte janë rruga absolute e revolucionit”, deklaroi Berisha.
Kreu i PD u ndal edhe te afera McGonigal, duke thënë se ish-zyrtari i FBI komplotoi kundër pluralizmit politik në Shqipëri duke shfrytëzuar valixhet me para që merrte nga Edi Rama.
“Askush s’duhet të ketë iluzion se McGonigal ishte person i izoluar, jo. Dhe në këtë periudhë, ata të cilët vazhduan veprën McGonigal, me non gratat, me sulmet e paimagjinueshme ndaj PD, një forcë politike që po përpiqej të mbronte vlerat perëndimore, shtetin ligjor, po denonconte me gjithë mundësitë e veta, por kjo nuk duhet të ekzistonte për këtë mafie të tmerrshme, mafie të rrezikshme. Rama ndante para me valixhe, ushqente këto shushunja me valixhe dhe që shfrytëzonin pastaj pushtetin e vendeve të tyre kundër opozitës shqiptare. Grushte shteti për rrëzime opozite unë nuk kam lexuar ndonjëherë”, shtoi kryedemokrati.
Teksa foli për revolucionin Berisha tha gjithashtu se opozita është në hapat e para të mosbindjes civile, por gjithsesi ai përjashtoi dhunën si mjet për marrjen e pushtetit, duke theksuar se dhuna asgjëson PD.
“Duhet të vazhdojmë me persistencë absolute këtë revolucion. Në mënyrë kreative. Unë e di që çdo ditë do dëgjoni njerëz që ju thonë se pa dhunë, nuk përmbyset, nuk arrihet. Unë u them atyre, dhe ju do u thoni, se qëndresa është forcë. Dhuna nuk të sjell në objektivat që kërkon. Ne jemi në hapat më fillestarë të mosbindjes civile, të shfrytëzimit të potencialit të jashtëzakonshëm që ka mosbindja civile. Nuk shkojmë te forca. Sepse të shkosh te forca, do të thotë të marrësh pushtetin me forcë. Që në këtë moment, kjo forcë asgjëson veten. Por përdorim çdo formë të mosbindjes civile”, theksoi Berisha.
