Mjafton një gol i Brahim Diaz në minutën e shtatë që Milani të mbyllë përfundimisht kapitullin e krizës dhe këtë e bën me një fitore që mund të rezultojë vendimtare për sezonin e kuqezinjve.
Pas më shumë se një dekade skuadra kuqezi mund të rikthehet në majën e Europës por fillimisht duhet të ruajë këtë avantazh edhe në ndeshjen e kthimit ndaj Tottenham.
Në sfidën e parë të 16-ave në UEFA Champions League, Stefano Pioli dhe Milani i tij treguan fytyrën e vërtetë dhe shpirtin e skuadrës që u shpall kampione pak më shumë se 8 muaj më parë dhe këtë e bëne me krenari.
Ndeshje model për skuadrën italiane që shënoi fillimisht dhe më pas menaxhoi një sfidë që mund të dilte nga shinat nga momenti në moment. Leksion për Antonio Conten që duhet të bëjë më shumë bashkë me “Spurs”-at për të synuar një biletë mes 8 skuadrave të fundit në garë për kompeticionin më të fortë të klubeve në planet. Ndeshja e kthimit në “Tottenham Stadium” do të jetë një histori tjetër.
