Grupi i gjobëvënësve i përbërë nga Ergys Ahmetaj, Andi Basha dhe Gëzim Kusi u lanë në burg ditën e sotme nga Gjykata e Posaçme.
GJKKO vendosi masën arrest me burg për Ahmetjan, ndërsa burg me afat 30 ditor për dy të arrestuarit e tjerë, të cilët së bashku “vilnin” para nga biznesmenë duke u hequr si zyrtarë të shtetit.
Ata akuzohen për mashtrim në bashkëpunim të mbetur në tentativë, të kryer në kuadër të grupit të strukturuar kriminal.
Në dosjen hetimore që ka publikuar SyriTV zbardhen edhe detaje nga plani i të rinjve dhe rolet përkatëse, ndërsa nënvizohet se arrestimi ka ardhur pas kallëzimit të shtetasit Erald Çaushi.
Ai pretendon se menaxhon një kazino në Tiranë, ndërsa treshja në fjalë kanë tentuar t’i marrin shumën prej 40 mijë euro, duke përdorur emrin e drejtorit të Kadastrës, Artan Lame.
Sipas denoncuesit njëri nga të pandehurit është prezantuar si Andi Basha. Ky i fundit i ka thënë se do shkonte ta takonte për porosinë e Tanit për 40 mijë euro, dhe bëhet fjalë për emrin e shefit të Kadastrës Artan Lamen.
Çaushi ka nisur të dyshojë duke i kërkuar të shkojë në zyrë për të marrë paratë si dhe duke marrë shkas nga ngjarjet që kanë ndodhur më parë të raportuara në media, thotë ai para hetuesve, ka vendosur të lajmërojë policinë me dyshimet se po e mashtronin.
Gjatë kohës që qëndronte me Bashën, Çaushi ka vërejtur bisedat që po fshinte i pandehuri në aplikacionin “SnapChat”. Përmbajtja e tyre ishte: “Fol i qetë, thuaj se më ka dërguar Artani për porosinë“.
Dyshohet se Ergys Ahmetaj të jetë organizatori i mashtrimit, teksa Gëzim Kusi e kishte refuzuar kërkesën e tij për ta marrë ai porosinë. Kusi thotë para hetuesve se i kishte propozuar Ahmetajt emrin e Andi Bashës që e kishte shok, dhe më pas kanë kontaktuar me njëri-tjetrin duke vënë në jetë planin.
Të rinjtë u arrestuan të dielën teksa Policia sekuestroi 89 400 euro dhe sende të tjera me vlerë për hetimin.
Sakaq, policia ka shpallur në kërkim Florian Gjinin, pasi dyshohet se është bashkëpunëtor i tre personave që zhvasnin bizneset.
Gjini, i cili njihet me nofkën “Shkodrani”, së bashku me Ergys Ahmetaj, Andi Basha dhe Gëzim Kusin, tentuan të vidhnin në Kamzë biznesmenin Pëllumb Salilllarin.
Në dëshminë e tij para Gjykatës, 21-vjeçari Ergys Ahmetaj është shprehur se njihet me Florian Gjinin, pasi ishte takuar me të rastësisht para 4 muajve në Holandë.
