Protesta e Partisë Demokratike para Parlamentit pasditen e sotmem në të njëjtën kohë që bëhej opozitë edhe në sallën e Kuvendit përballë mazhorancës që “fshihte” përfshirjen e Edi Ramës në skandalin McGonigal, është pasqyruar edhe në mediat amerikane.
Washington Post pas një artikulli të zgjeruar pasditen e sotme ku “zbërthente” aferën McGonigal, i ka kushtuar një artikull tubimit para Kuvendit, ku u protestua për të njëjtën kauzë.
Ligjvënësit shqiptarë të opozitës, duke i fryrë bilbilit, ndërprenë një seancë të Parlamentit të hënën për të kërkuar dorëheqjen e qeverisë të dyshuar për korrupsion, ndërsa qindra mbështetës të tyre jashtë u përpoqën të futeshin në ndërtesë.
Policia mbajti jashtë demonstruesit, të cilët hodhën tymuese dhe fishekzjarre përpara se të shpërndaheshin. Nuk raportohet për të arrestuar apo lënduar.
Tensioni pasoi një protestë të ngjashme të shtunën në të cilën morën pjesë mijëra mbështetës të opozitës.
Protestat po organizohen nga Partia Demokratike e qendrës së djathtë e ish-presidentit dhe kryeministrit Sali Berisha dhe Partia e Lirisë e ish-presidentit Ilir Meta.
Brenda sallës Berisha dhe ligjvënës të tjerë pushtuan foltoren dhe i frynë bilbilave për të ‘mbytur’ fjalën e kujtdo tjetër që përpiqej të fliste. Kryeparlamentarja e mbylli seancën pa diskutuar për asnjë nga çështjet e rendit të ditës.
“Populli do të flasë”, tha Berisha pas daljes nga salla e parlamentit dhe u zotua të vazhdojë protestat në fund të kësaj jave.
Opozita akuzon Partinë Socialiste të kryeministrit Edi Rama për korrupsion dhe lidhje me krimin e organizuar dhe e konsideron atë përgjegjës për eksodin e të rinjve shqiptarë që janë larguar për të ndjekur punë në vendet e Europës Perëndimore.
Qeveria e mohon këtë dhe thotë se kabineti ka mbajtur inflacionin të ulët në krahasim me vendet e tjera në Evropë dhe ka subvencionuar energjinë elektrike për familjet dhe bizneset e vogla.
Opozita akuzon Ramën gjithashtu se ka korruptuar Charles McGonigal, një ish-zyrtar i lartë i kundërzbulimit të FBI-së, i cili akuzohet në Shtetet e Bashkuara se ka fshehur nga FBI detajet kryesore të një udhëtimi në Shqipëri në vitin 2017 me një ish-zyrtar të inteligjencës shqiptare, i cili dyshohet se i kishte dhënë të paktën 225,000 dollarë.
