Për rreth tre orë opozita shqiptare ka protestuar sot në Bulevardin “Dëshmorët e Kombit” dhe jo vetëm pasi turma u zvendos te selia e PS, Bashkia e Tiranës dhe Ministria e Brendshme, në tubimin që u thirr nga Partia Demokratike dhe lideri i saj Sali Berisha.
Mijëra qytetarë iu bashkuan tubimit dhe njëzëri përsëritën thirrjen për të kërkuar dorëheqjen e Edi Ramës nga posti i kryeministrit.
Gjatë protestës nuk munguan as incidentet, pasi tre protestues hodhën shashka dhe tymuese drejt kryeministrisë, por fatmirësisht nuk pati persona të lënduar.
Pas këtij episodi, policia bëri të mundur shoqërimin e tyre në komisariat. Lidhur me tre të arrestuarit ka reaguar menjëherë Partia Demokratike, pasi deputetë të saj janë nisur drejt komisariateve të policies ku mbështetësit e tyre po mbahen.
Deputetët janë nisur drejt komisariateve Nr. 1 dhe 2 në mbështetje të tre protestuesve të ndaluar.
Sipas PD-së, policia i ka ndaluar këta protestues në shkelje të së drejtës kushtetuese të protestës.
