Albana Vokshi, Oerd Bylykbashi dhe disa deputetë të tjerë të Partisë Demokratike menjëherë pas mbylljes së protestës kombëtare janë stacionuar pranë komisariateve Nr.1 dhe 2 në kryeqytet.
Ligjvënësit demokratë kërkojnë lirimin e menjëhershëm të tre protestuesve që u shoqëruan nga policia si shkaktarë të incidentit te Kryeministria, ku u hodhën tymuese dhe kapsolla.
Bylykbashi teksa kërkoi lirimin e mbështësve demokratë tha gjithashtu se protestuesit do t’i përgjigjen me votë dhe me çdo lloj mënyre kryeministrit Edi Rama.
“Erdhëm në komisariat për shoqërimet që janë bërë nga policia. Ishte një protestë madhështore që dha mesazhe të jashtëzakonshme. Ishte një protestë paqësore por e qartë se nga sot e tutje fillon revulucioni demokratik. Në këtë lëvizje është e drejta e çdo qytetari të marrë pjesë dhe të protestoj fort. Përpjekja është për të bërë totalisht themelet e demokracisë. Pluralizimin politik. Protesta e sotme është mesazhe fillimi, protestat do vazhdojnë”, tha Bylykbashi.
Ai nënvizoi se deputetët e opozitës do t’i qëndrojnë në krah çdo qytetari dhe se Rama do të dorëzohet përballë shqiptarëve.
“Sot protestuesit kanë dhënë një shembull të jashtëzakonshëm. Të gjithë qytetarët që janë shoqëruar do të lirohen sepse është e paligjshme shoqërimi i tyre. Deputetët janë të gatshëm t’i qëndrojnë pranë çdo qytetari. Ose Edi Rama do të dorëzohet para të drejtës së shqiptarëve për të votuar dhe për ta shporrur me votë ose qytetarët më pas do ta largojnë”, shtoi ai.
