Dy të moshuar janë gjetur të pajetë këtë të Shtunë në banesën e tyre, në fshatin Rrapëz të Lushnjes. Viktimat janë Lame Kalliri, 90 vjeç dhe Qlibari Kalliri, 81 vjeç, burrë e grua.
Çifti i bashkëshortëve, sipas hetimeve parapake, dyshohet se kanë ndërruar jetë për shkak të asfiksisë nga gazi.
“Rreth orës 10:40, në fshatin Rrapëz, Lushnjë, janë gjetur në banesën e tyre, pa shenja jete, shtetasit L. K., 90 vjeç dhe Q. K., 81 vjeçe, të cilët dyshohet se kanë ndërruar jetë për shkak të asfiksisë nga gazi”, njoftoi policia.
Grupi hetimor po punon për zbardhjen e plotë të ngjarjes dhe përcaktimin e shkakut të vdekjes, shtuan të njëjtat burime.
