Pozitat e Dani Alves, i cili akuzohet për përdhunim nga autoritetet në Barcelonë janë rënduar edhe më tepër pasi ditën e sotme janë bërë publike rezultatet e testit të ADN-së që i janë bërë atij dhe “viktimës”.
Ylli brazilian, i cili aktualisht ndodhet në burgun “Brians 1” në Barcelonë pas akuzave për sulm seksual, ka kërkuar lirim me kusht, por nuk pritet asnjë lehtësim pas rezultatit të ADN-së.
Siç raporton “El Periodico”, gjurmët e lëngjeve trupore të marra nga trupi i viktimës, nga rrobat e saj dhe nga dyshemeja e dhomës së përdhunimit të dyshuar kanë të njëjtin profil gjenetik me futbollistin brazilian.
Testi i ADN-së duket se vërteton akuzat e gruas për Alves, ndërkohë që situata për të përkeqësohet edhe prej faktit se ai vetë ka dhënë disa versione të ndryshme të fakteve përpara hetuesve.
Për këtë arsye, për momentin si Prokuroria e Gjykatës së Barcelonës ashtu edhe avokatët e viktimës së pretenduar po kërkojnë me forcë që ish-mbrojtësi i katalanasve të mos lirohet provizorisht, për shkak të rrezikut të arratisjes.
