Dy ditë pasi një dokument me 266 faqe, ku listoheshin mijëra punonjës të administrates, mjekë, efektivë e drejtues të lartë të Policisë së Shtetit, prokurorë të SPAK dhe punonjës të gjykatave e prokurorive në rrethe që kanë shkarkuar në telefonat e tyre aplikacionin “Aktiv1sti”, qarkulloi online, Partia Socialiste me një reagim të bërë sot “kërcënon” të gjitha mediat që të mos publikojnë të dhëna nga kjo platformë.
Sipas reagimit të PS, forca qeverisë i drejtohet me një kërkesë të gjithë mediave audiovizive dhe atyre online që të mos publikojnë të dhënat personale të personave që janë pjesë bërë pjesë e aplikacionit të krijuar nga socialistët, i cili është komentuar si një fuqi matëse elektorale para zgjedhjeve lokale të 14 majit.
Në kërkesën e drejtuar mediave PS thotë se publikimi i të dhënave nga ‘Aktiv1sti’ cenon të drejtat e qytetarëve dhe u bën thirrje mediave që i kanë publikuar të dhënat t’i fshijnë ato.
“Partia Socialiste e Shqipërisë kërkon nga mediat audiovizive, mediat elektronike dhe të gjitha platformat e portalet online që të refuzojnë në çdo rast publikimin e të dhënave të pjesshme apo të plota qofshin ato, që pretendohet se janë siguruar nga ndërhyrja e kundraligjshme në platformën elektronike “Aktiv1st”, pronë e P.S.SH si dhe të fshijnë çdo informacion nga përmbajtja e faqeve të tyre të internetit të publikuar deri tani”, shkruhet në kërkesë.
Në rast se mediat do të vazhdojnë të publikojnë të dhënat e përdoruesve edhe pas kësaj kërkese, PS thotë se do ndjekë këtë çështjen në mënyrë ligjore.
“Partia Socialiste e Shqipërisë do të ndjekë në mënyrë rigoroze këtë rast dhe do të procedojë sipas ligjit për hetime të mëtejshme në Prokurorinë pranë Gjykatës së Rrethit Gjyqësor Tiranë, për çdo media e cila do të vazhdojë të kryejë publikimet e këtyre të dhënave në shkelje të ligjit edhe pas kësaj kërkese publike”, shkruhet në kërkesë.
