Më 3 Mars, Apeli i Gjykatës së Tiranës do të gjykojë ankimin e “grupit Alibeaj” ndaj vendimit të shkallës së parë, që regjistroi Kuvendin e 11 Dhjetorit 2021 dhe vendimet e marra aty.
Gjykata e Apelit informon se “ankimi i Partisë Demokratike, ndaj vendimit nr. 3 datë 25.03.2022 (Gjyqtar Agron Zhukri) të Gjykatës së Rrethit Gjyqësor Tiranë, është planifikuar për tu gjykuar me datë 03.03.2023, ora 11:00”.
Trupi gjykues përbëhet nga relatore Elona Mihali dhe anëtarë Irida Kacerja e Astrit Kalaja.
Kujtojmë se edhe vendimi i KQZ në lidhje me regjistrimin e Partisë Demokratike në zgjedhjet e 14 majit do të merret në javën e parë të marsit.
Ashtu siç vetë kreu i institucionit, Ilirjan Celibashi bëri me dije pak ditë më parë, pas mbledhjes ku u la jashtë rendit të ditës lista me anëtarët e depozituar për KZAZ-të nga të dyja kampet e PD-së, do të jetë 7 Marsi dita kur do të vendosin se cilën PD do të regjistrojë KQZ si subjekt zgjedhor.
“Të dyja përgjigjet që jap qëndrojnë. Jemi në proces të verifikimit të dokumenteve të paraqitur nga PD në lidhje me propozimet për anëtarë të KZAZ. Duke shtuar edhe faktin që kemi dy lista, një nga Noka në cilësinë e sekretarit të përgjithshëm të PD dhe tjetra nga Sefa që është përfaqësuesi ligjor i PD në KQZ.
Situata është e tillë që do duhet të konsultojmë, maksimumi deri më datën 7 mars mbi legjitimitetin e personit që do duhet të përfaqësojë interesat e PD, më së pari në procesin e regjistrimit si subjekt zgjedhor në KQZ. Këtu fillon përgjigja e dytë. Ajo që dertiminuar më shumë është fakti se ne jemi në këtë situatë. Por duke e sqaruar edhe njëherë . Vendimmarrja do jetë strikte bazuar në Kodin Zgjedhor, s’kemi ardhur në atë moment që dikush të bëjë interpretimin se ky vendim ishte i drejtë apo i gabuar. Mbetet e padiskutueshme ajo që kam thënë, në momentin që do vendosim do jetë në përputhje me parashikimet e ligjit dhe do jetë e thjeshtë. Skam asnjë lloj problemi apo drojë për ta marrë këtë vendim. Është shumë e thjeshtë”, tha Celibashi.
Vendimi për të caktuar datën kur do të shqyrtohet çështja e “Vulës” së PD në Gjykatën e Apelit vjen gjithashtu një ditë para protestës së Partisë Demokratike dhe paralajmërimeve të fundit të Sali Berishës se Edi Rama po i bën të gjitha përpjekjet për të mos lejuar forcën kryesore opozitare të regjistrohet në zgjedhje.
Gjatë fjalës së tij nga selia blu, pas mbledhjes me kryetarët e degëve në të gjithë vendin që u zhvillua një javë më parë, Berisha paralajmëroi Edi Ramën për atë çfarë pritet të ndodhë nëse tenton të pengojë regjistrimin.
“Ka një përpjekje tjetër siç e dini nga Edi Rama direkt, për të përjashtuar PD-në nga zgjedhjet. Kësaj përpjekje do t’i përgjigjemi me revoltë të përgjithshme. Secili prej jush dhe çdo anëtar i PD duhet ta ketë të qartë si kristali, se gjykatat e këtij vendi, në përputhje me ligjin dhe Kushtetutën ka vendosur legjimitetin e kuvendit të 11 dhjetorit 2021. Dhe në çdo vend të botës, ky vendim ka vetëm një vlerë, për regjistrimin në regjistrin e partive politike dhe shoqatave.
Ky vendim në çdo vend të lirë shërben vetëm për kaq. Edi Rama urdhëron të mos regjistrohet nga kancelari vendimi i gjykatës dhe në kundërshtim flagrant me çdo parim, shpall palë Alibashën, pa qenë palë. Çfarë jemi këtu, në këtë situatë, jemi në një përpjekje primitive hakmarrëse për të përjashtuar PD-në nga zgjedhjet. PD do të futet në zgjedhje dhe do të futet vetëm me vulën, logon dhe flamurin e saj. Absolutisht kurrë nuk do të pranojmë të na lejë njeri, të na përjashtojë nga zgjedhjet. Ndaj dhe do të organizojmë revoltën paqësore më të fuqishme që ka njohur Shqipëria. Do të përdorim të gjitha mjetet e mosbindjes civile, dhe zgjedhjet do t’i fitojë PD-ja”, tha kryedemokrati.
