Deputeti i Partisë Demokratike, Ervin Salianji ka komentuar vendimin e komisionit të etikës që përjashtoi për dhjetë ditë nga seancat plenare dhe komisionet, tetë deputetë të opozitës.
Mes emrave të përjashtuar është edhe vetë Salianji, për shkak se në seancën e kaluar plenare, ai dhe kolegët e tij zaptuan foltore duke kërkuar që në seancë të ishte i pranishëm kryeministri Rama që të përgjigjej për skandalin “McGonigal”.
“Qesharak, së pari s’ka asnjë vlere se tregon përpjekjen foshnjarake të qeverisë për të eleminuar zërat e opozitës nga seancat plenare që i bie te 13-14 deputetë brenda një jave të përjashtuar.
Imagjinoni cfarë instikti ka kjo qeveri e ky kryeministër që kërkon të eleminojë në cdo formë opozitën dhe fjalën e vetmja gjë që ka opozita.
I shmanget debatit për një skandal që i djeg miza nën kësulë ku është përfshirë e mendojnë do ta mbulojnë me budallëqe që përjashtohen deputetët me 10 ditë që të mos kenë mundësi apo sa më pak zëra që të flasin në seancë”, tha ai në nj intervistë në studion e News24.
Kujtojmë që ditën e djeshme deputetët e mazhorancës në komisionin e etikës vendosën të pranonin kërkesën e kolegëve të tyre socialistë për pushimin nga seancat dhe komisionet parlamentare për 10 ditë të 8 deputetëve të PD-së.
Në kërkesën e firmosur nga 7 deputetë socialistë, thuhet se Boçi, Vokshi, Salianji, Zhupa, Baçi dhe Shehu në mënyrë të koordinuar bllokuan foltoren e Kuvendit në seancën e fundit parlamentare, kur pati përplasje mes palëve për rastin “Mc Gonigal.
Ndërsa deputetët Bardhi dhe Nallbati, sipas PS, kanë artikuluar fjalë fyese drejtuar kryetares së Kuvendit.
