Pasi e shpallën si një nga 7 monumentet e kulturës më të rrezikuara në europë, një ekip arkitektësh dhe inxhinierësh nga Europa Nostra ka mbërritur në Shqipëri dhe kanë parë nga afër Urën e Zogut, e cila është në rrezik shembjeje.
Së bashku edhe me arkitekt dhe inxhinierë shqiptarë, ‘të dërguarit’ e Europa Nosta janë duke parë mundësitë e përforcimit të saj dhe kryerjen e një analize të thellë për projektin e restaurimit.
“Jemi këtu sepse ura e Zotit është një nga 7 momumentet e kulturës më të rrezikuara në Europë. Mendojmë se inxhinerët shqiptarë janë shumë të përgatitur. E kanë dhënë idenë e tyre, mendojmë se ky monument meriton vëmendjen e duhur. Fillimisht ta stabilizojmë, e më pas pse jo ta vendosim në dobi të qytetarëve,“-tha Pedro Ponce de Leon, arkitekt Europa Nostra.
Ura e Zogut është ndërtuar në vitin 1927 dhe gëzon statusin e Monumentit të Kulturës së kategorisë së parë. Ajo është e veçantë për shkak të harqeve të saj, ndërsa në kohën e ndërtimit, ka qenë një prej rrugëve kryesore që lidhnin Shqipërinë e Mesme me atë të Veriut.
Por për shkak se është lënë në harresë, njëra nga këmbët e urës është zhytur në shtratin e lumit më shumë se 2 metër.
