Duke iu referuar një mesazhi të ardhur në adresë të saj, deputetja demokrate Albana Vokshi ngre shqetësimin se mësuesit e Shkollës Profesionale në Kamëz kanë dy muaj pa marrë pagat.
Në mesazhin drejtuar Vokshit, që deputetja e ka bërë publike, sqarohet “se mësuesit e shkollës Profesionale Kamëz nuk kanë marrë pagën e dhjetorit pasi prej një muaji drejtori i shkollës ka kaluar drejtor ujësjellësi dhe mësuesit nuk kanë marrë pagat, ndërkohë që duhej të merrnin edhe të janarit tani”.
“Pra dy muaj pa paga. Për ujësjellësin dhe tenderat në të janë më të interesuar se për pagën e mësuesve që torturohen çdo ditë”, thuhet më tej në mesazh.
Vokshi shprehet se $225 mijë dollarë i ka dhënë Kryeministri Rama ish-drejtuesit të FBI, por mësuesit e shkollës profesionale Kamëz kanë dy muaj pa marrë pagat me të cilat mbajnë familjet e tyre.
“Ministrja e Arsimit Evis Kushi pse hesht? Familjet nuk ushqehen me propagandë”, shton.
Vokshi shprehet se shqiptarët nuk e meritojnë këtë kryeministër, ndërsa bën thirrje që Rama të largohet.
“Të gjithë mësuesit duhet të protestojnë për të drejtat e tyre”, është apeli me të cilin deputetja e mbyll reagimin në rrjetet sociale.
