Arrestimi i ish-shefit të FBI-së në Nju Jork Charles McGonigal, lidhjet me Shqipërinë dhe kryeministrin Edi Rama, kanë qenë së fundmi në qendër të raportimeve të mediave prestigjioze amerikane. Këtë të Hënë, për çështjen ka shkruar “CNN”, që ndalet dhe te marrëdhënia e McGonigal me Ramën si dhe akuzat se ish-zyrtari i FBI-së ka ndikuar te autoritetet amerikane për të nisur një hetim ndaj ish-lobistit të PD-së Nik Muzin.
Në raportimin nga Katie Bo Lillis dhe Evan Perez, të titulluar “’Ai ishte një nga këta rokstarë’: Ish-agjentët e FBI-së të tronditur nga akuza e një prej tyre“, shkruhet për “një marrëdhënie të fshehtë që ai (McGonigal) mbante me Kryeministrin e Shqipërisë”.
CNN përcjell dëshminë e një ish-zyrtari të lartë të FBI-së, i cili e konsideron shqetësues protagonizmin e McGonigal në nisjen e hetimit ndaj lobistit të PD-së.
“Pasi doli në pension në vitin 2018, sipas padisë së Nju Jorkut, McGonigal shkeli sanksionet e SHBA-së duke marrë pagesa të paligjshme për të ndihmuar Deripaskën në përpjekjen për të hequr sanksionet e SHBA kundër tij dhe për të hetuar një rival politik në Rusi.
Për disa zyrtarë aktualë dhe ish-zyrtarë, sjellja e McGonigal ndërsa ai ishte ende duke punuar në byro është shumë më ‘e tmerrshme’, siç tha një ish-zyrtar i lartë, sesa akuzat kundër tij lidhur me Deripaskën u ngritën pasi ai kishte dalë në pension.
Veçanërisht shqetësues, tha ky person, është dyshimi se McGonigal bëri që FBI të hapte një hetim penal për një shtetas amerikan, në të cilin personi i lidhur më parë me inteligjencën shqiptare pritej të vepronte si një burim njerëzor – por nuk arriti të zbulonte marrëdhënien e tij financiare me atë person.
Kjo është tepër serioze, padyshim kaq e gabuar – nëse ai ka bërë këto gjëra që ata pretendojnë, nuk është një zonë gri”, tha ish-zyrtari i lartë i FBI-së.
CNN raporton po ashtu se ish-zyrtarët e FBI-së që punuan me McGonigal thanë se ishin të habitur, të zhgënjyer dhe “të mërzitur” kur mësuan lajmin:
“’Ky djalosh ishte jashtëzakonisht i respektuar dhe shihej vërtet si një ekspert i kundërzbulimit në karrierë’, sipas një ish-zyrtari të lartë të FBI-së që punonte me McGonigal. ‘Ai ishte një nga këta yje të rrokut [në kundërzbulimin] i cili, kur dolën punë të vështira, kur dolën detyra shumë të ndjeshme, ai ishte në listën e ngushtë të njerëzve që do t’i shikoje dhe do të thoshe, ‘Hej, ku është Charlie, çfarë do bëjë ai për gjashtë muajt e ardhshëm?’”.
Peter Lapp, një ish-agjent i kundërzbulimit të FBI-së, i cili dikur ka punuar për McGonigal, i tha CNN se rasti McGonigal është “një siklet absolut” për FBI-në.
Zyrtarët aktualë dhe ish-zyrtarë të FBI-së të njohur me McGonigal dhe punën e tij thonë se ata besojnë se McGonigal – një ish-kontabilist – thjesht u bë “i pangopur”.
