53 mjekë, infermierë dhe ekspertë të kërkim-shpëtimit janë nisur nga Shqipëria drejt provincave të dëmtuara nga tërmeti në Turqi. Misione ka nisur edhe shtabi i emergjencave të BE dhe të NATO-s për t’i ardhur në ndihmë Ankarasë në kapërcimin e situatës tragjike.
Një mision ndihme nga Forcat e Armatosura të Shqipërisë, dhe Agjencia Kombëtare e Mbrojtjes Civile, në përbërje të të cilit janë 53 personel mjekësor, specialistë të kërkim-shpëtimit si dhe 7 mjete janë nisur drejt Turqisë, ku do të marrin pjesë në operacionet e kërkim-shpëtimit, për të lehtësuar sadopak pasojat e kësaj tragjedie.
Pjësëtarët e ekipit që do të marrin pjesë në këtë mision solidariteti u përcollën në një ceremoni të veçantë, ku mori pjesë edhe Ministri i Mbrojtjes Niko Peleshi.
Peleshi tha se ky është një kontribut që i kthehet Turqisë, e cila e ka ndihmuar Shqipërinë vazhdimisht gjatë tërmetit të 26 nëntorit 2019.
