Komisioni Qendror i Zgjedhjeve është ende i paqartë për vendimin që do të marrë lidhur me faktin se cilën nga PD-të do të regjistrojë në zgjedhje, në një kohë që janë dërguar dy lista për anatërë të KZAZ-ve, një me firmën e Flamur Nokës dhe tjetra me firmën e grupit Alibeaj.
Pavarësisht se bëri thirrje që faktorët politikë të punojnë për të zgjidhur ngërçin që ka vendosur në pozitë edhe KQZ, kreu i saj Ilirjan Celibashi la të kuptohej se vendimi final mund të anojë nga grupimi i Alibeajt.
“Ne nuk e njohim realitetin politik të momentit, pasi qoftë dhe si individ i ndjek dhe i shikoj zhvillimet. Kjo vendimmarrje do jetë rrjedhojë e gjykimit tim. Është ky fakt, pra kemi dy propozime për anëtarë të KZAZ-ve. Nga z. Indrit Sefa që është përfaqësuesi i PD-së në KQZ, dhe kemi një propozim të sjellë nga z. Flamur Noka në cilësinë e Sekretarit të Përgjithshëm të PD-së. Dhe në fakt jemi në proces të verifikimit të dokumentacionit mbi propozimet për anëtarë të KZAZ-ve jo vetëm për PD-në por edhe për 3 partitë e tjera që kanë të drejtë. E njëjta procedurë do të njihet nga ne, por ka të shtuar këtë aspekt se kush është ai që ka të drejtë të bëjë propozimet për anëtarë të KZAZ-së”, u shpreh Celibashi.
Gjithashtu në vijim të fjalës së tij, Celibashi theksoi se PD si partia kryesore e opozitës rrezikon të mos regjistrohet fare në zgjedhje.
“Është ky realitet dhe mua më vjen keq që gjendemi në këtë situatë, jo për KQZ-në. Nuk kemi asnjë lloj interesi dhe simpatie politike tej komenteve që çdokush bën jashtë këtij institucioni. Kjo vendimmarrje do të jetë në respekt të ligjit. Do të ishte më rëndë nëse dikush do ta komentonte se kjo vendimmarrje është urdhëruar nga dikush jashtë. Një gjë është e sigurt që kërkesa si për rastin e komisionerëve ashtu dhe për regjistrimin e Partisë Demokratike, ne do të vendosim sipas asaj që njeh ligji. Ne do të disponojmë vetëm për një PD dhe është vetëm një person që ne njohim dhe ka juridiksionin për PD-në. Nuk mundet sikur të bëjmë sikur nuk do ndodhë asgjë, pasi PD-ja edhe mund të mos regjistrohet. Nuk mund ta injorojmë këtë situatë”, u shpreh ai.
