Kreu i Partisë së Lirisë Ilir Meta, është shprehur se skandali më i fundit që ka pushtuar ballinat e mediave amerikane dhe botërore është “thikë në zemër” për marrëdhëniet shqiptaro-Amerikane.
“Skandali më i fundit që ka pushtuar ballinat e mediave amerikane dhe botërore këto ditë është vërtet një thikë m’u në zemër për marrëdhëniet shqiptaro-amerikane, ashtu siç me të drejtë shkruan sot edhe z.Frank Shkreli, ish-Drejtor i VOA për Shqipërinë”, shkruan Meta.
Me anë të një postimi në FB, Meta shkruan se një hetim i plotë si në SHBA por edhe në Shqipëri, është i domosdoshëm për t’i mbrojtur marrëdhëniet midis dy vendeve.
“Ndaj hetimi i plotë, i thellë dhe gjithëpërfshirës, si në SHBA por edhe në Shqipëri i këtij skandali është i domosdoshëm për t’i mbrojtur marrëdhëniet midis dy vendeve tona nga ndikimi i paligjshëm dhe korrupsioni. Aleanca strategjike midis Shqipërisë dhe SHBA veçse forcohet duke vënë përpara ligjit abuzuesit dhe të korruptuarit cilëtdo qofshin ata!”, përfundon Meta.
