“Darët” e operacionit “Fijet” që nisi në Shkodër e vjoi në qytete të tjera problematike si Vlora, Durrësi e Shijaku, duke çuar në çmontimin e mbi 100 kamerave të sigurisë që përdoreshin nga grupet e krimit të organizuar për të monitoruar kundërshtarët dhe veprimet e forcave të rendit, tashmë po godasin në Tiranë.
Në zonën e “Ali Demit” është zhvilluar një aksion për çmontimin e kamerave të sigurisë, të cilat janë vendosur nga një person me precedentë penal.
Kamerat janë çmontuar nga efektivët e Komisariatit Nr.1, në banesën e shtetasit E.K., i cili rezulton të keqtë qenë i dënuar më parë për vrasje. Personi në fjalë që e kishte blinduar shtëpinë me 5 kamera është gjithashtu i skeduar nga operacioni “Forca e Ligjit”.
Ndërkohë, 6 kamera janë çmontuar edhe në zonën pranë shkollës “Kushtrimi i Lirisë” në Ali Dem.
Deri më tani janë çmontuar rreth 11 kamera në total, ndërsa kontrolli do të vijojë edhe në zonën e Shkozës.
Çmontimi i kamerave do vijojë në të gjithë zonat e kryeqytetit, ku secili komisariat do çmontojë kamerat e paligjshme në zonat që mbulojnë.
