Kryetari i PD-së, Sali Berisha ceku këtë të Hënë firmosjen e marrëveshjes për Portin e Durrësit, të cilën e cilësoi një grabitje.
“Ne nuk mundet kurrë të pranojmë të qeverisemi nga një kryeministër, i cili me firmën që vendosi sot, u grabit shqiptarëve pronën publike më të çmuar, portin e Durrësit. Ne nuk mund të pranojmë një kryeministër i cili me klanin e tij, Amant Josif dhe Olsi Ramë, dalin dhe ju vjedhin 2 miliardë euro qytetarëve evropiane”, theksoi Berisha gjatë fjalës së mbajtur me rastin e ceremonisë së 32-vjetorit të degës së PD-së në Vorë.
Më herët, PD deklaroi se “nuk do ta njohë marrëveshjen e nënshkruar sot mes një kryeminisri në ikje dhe një përfituesi si Alabari”.
Zgjedhjet
Duke u ndalur te zgjedhjet lokale, Berisha tha se kandidatët e opozitës do të fitojnë në 14 maj.
“Kur nisëm këtë rrugë 32 vite më parë ne ishim në monizëm të plotë, por duhet ta dini se monizmi dhe zhvillimi, liria dhe dinjiteti janë të papajtueshme. Ndaj dhe ne në ato vite, më vendosmëri, guxim përmbysëm monizmin që bazohej në ideologjinë komuniste. Sot pas 32 vitesh është reale, e trishtë, e hidhur, ne në Shqipëri na është rikthyer monizmi, jo më i bazuar në doktrinën marksiste-leliniste, por në krimin, vjedhjen e drogën. Kjo është ju them unë ju, diktatura më e urryer, diktatura që krijon pasigurinë më absolute, që kthen kohën pas. Pra sot në rast se u ndalëm tek arritjet e 32 viteve, u ndalëm për të kuptuar se ne përsëri sot jemi në një mision, dhe ky mision do të na çojë ne në përmbysjen e monizmit dhe fitoren e shkëlqyer të Indrit Hoxhës, e kandidatëve të opozitës në mbarë Shqipërinë”, tha Berisha.
