Të enjten e shkuar Edi Rama iu shamng llogaridhënies për aferën McGonigal duke mos u paraqitur në Parlament, teksa Sali Berisha me deputetët e PD bllokuan foltoren duke kërkuar që kryeministri të dalë e të flasë për dosjen amerikane që e lidh atë me korruptimin e ish-zyrtarit të FBI-së.
E teksa shefi i qeverisë u shfaq vetëm sot në publik pas pesë ditëve mungesë në ekrane dhe heshtjeje lidhur me skandalin, duket se edhe të enjten në Kuvend do të ketë një ditë të vështirë.
Kjo pasi Konferenca e Kryetarëve me vendimin e marrë sot ka futur në kalendarin e punimeve të Kuvendit kërkesën për interpelancë urgjente me kryeministrin.
Ajo ishte kërkuar nga grupi i Enkelejd Alibeajt dhe lidhet me çështjen “McGonigal”.
Ndërkohë që në mbledhjen e sotme, deputetja e PD Flutura Açka, ka ngritur me forcë shqetësimin për mënyrën se si u mbyll seanca e shkuar duke shmangur kështu debatin për ish-zyrtarin e FBI, Charles McGonigal.
“Po ndodh fashistizimi i Parlamentit. Në nuk jemi as prokurorë dhe as inkuizitorë por jemi mandatuar të kërkojmë llogari dhe mbyllja e seancës është shkelje e Rregullores së Parlamentit dhe Kushtetutës së Republikës”, ka deklaruar deputetja.
