Sekretari i Përgjithshëm i NATO-s, Jens Stoltenberg, në një takim me ministrin e Jashtëm të Koresë së Jugut, tha se NATO është e shqetësuar për testet raketore të Koresë së Veriut dhe për programin e armëve bërthamore.
“Ne jemi të shqetësuar për testet e raketave dhe programet bërthamore të Koresë së Veriut . Lufta në Ukrainë ka pasoja gjithashtu për këtë rajon dhe ne e dimë se Koreja e Veriut po ofron mbështetje ushtarake për Rusinë dhe kjo nxjerr në pah mënyrën se si jemi të ndërlidhur”, tha sekretari i NATO-s, Stoltenberg.
Në vizitën e parë që nga Nëntori 2017, Stoltenberg kërkon që me udhëtimin e tij në Azi të forcojë marrëdhëniet me aleatët e SHBA-së.
“Ne besojmë fort se mund të bëjmë më shumë së bashku në fusha si kibernetika apo teknologjia dhe gjithashtu kur bëhet fjalë për kontrollin e armëve”, u shpreh ai.
Koreja e Veriut, por edhe Rusia kanë mohuar akuzat e SHBA-së se Pheniani po furnizon me armë Moskën për luftën në Ukrainë.
