Pas Shkodrës, Korça është qarku tjetër, ku janë zbuluar kamera të sigurisë, që dyshohet se janë të vendosura nga grupet kriminale për të monitoruar lëvizjet e uniformave blu. Ditën e sotme, në vijimësi të operacionit “Fijet”, janë hequr 39 kamera sigurie, dhe 9 persona janë vënë në hetim.
Në qytetin e Korçës, 21 kamerat ishin vendosur në lagjet nr. 2, 4, 5, 7, si dhe në fshatin Dishnicë, e ndërsa 18 të tjerat ishin vendosur në lagjen nr. 1, Pogradec.
Kamerat ishin të instaluara në shtylla elektrike, në zona që konsiderohen si shumë të frekuentuara nga qytetarët. Të gjitha kamerat e çmontuara dyshohet të jenë të lidhura me aparate celulare dhe komandimi i tyre të bëhet përmes internetit, edhe nga jashtë shtetit, dyshohet në Gjermani.
Mësohet se ka nisur hetimi ndaj Zamir Musllit, Albina Qiraxhit, Gentian Çipit, Romeo Staraveckës, Gjergji Romaçkës, Petrit Bregut dhe Marius Dvorani banues në Korçë si edhe Arben Berberit, Nevrus Llapushit në Pogradec.
Rezulton se disa prej tyre janë persona me precedent penal, ose kanë familjarët e tyre.
-Rezulton se Romeo Staravecka është i dënuar për “Prodhim dhe shitje narkotikësh”.
-Nevrus Llapushi, babai i Erion Llapushi, person me rrezikshmëri të lartë i shpallur në kërkim për vrasjen e një personi në Elbasan.
-Gjergji Romaçka, babai i Ligor Romaçkës, i dënuar për “Trafikim të narkotikëve”.
-Marius Dvorani, babai i tij me precedent penal të mëparshëm.
“Strukturat hetimore të DVP Korçë, në bashkëpunim me komisariatet e Policisë në varësi të saj, në zbatim të detyrave të përcaktuara në kuadër të planit operacional mbarëkombëtar të koduar “Fijet”, i iniciuar nga Drejtoria e Përgjithshme e Policisë së Shtetit, si dhe me mbështetjen e inteligjencës informative, për vendosjen e paautorizuar të disa kamerave, konkretisht në disa lagje të qyteteve Korçë e Pogradec, me qëllim sigurimin e informacioneve, për qëllime kriminale, si dhe për të monitoruar lëvizjet e Policisë, kanë organizuar punën për evidentimin dhe çmontimin e këtyre kamerave, identifikimin e pronarëve të tyre, si dhe për dokumentimin e plotë ligjor të qëllimit të përdorimit.
Gjatë fazës së pestë të këtij plani operacional, në Korçë, në lagjet nr. 2, 4, 5, 7, si dhe në fshatin Dishnicë, Korçë, janë çmontuar 21 kamera, si dhe janë në hetim, shtetasit Z. M., A. Q., G. Ç., R. S., Gj. R., P. B. dhe M. D.. Plani operacional ka vijuar në Pogradec ku u çmontuan dhe u sekuestruan 18 kamera të vendosura në lagjen nr. 1, Pogradec. Në vijim të veprimeve procedurale për këto raste, janë në hetim shtetasit A. B. dhe N. Ll”, njofton policia.
Po sot, janë vënë në hetim 2 shtetas, për ndërhyrje të padrejta në jetën private në qarqet Gjirokastër dhe Dibër.
Gjatë kontrolleve, Policia çmontoi në Memaliaj, 3 kamera të vendosura në kundërshtim me ligjin, si dhe ka vënë në hetim shtetasin P. K.. Ndërkohë, në qytetin e Burrelit, Policia çmontoi 1 kamer të vendosur në kundërshtim me ligjin, si dhe ka vënë në hetim shtetasin G. D..
Disa ditë më parë, policia e Shkodrës ka çmontuar 21 kamera të cilat ishin vendosur në shtyllat elektrike. Blutë bënë me dije se kamerat ishin instaluar me qëllim marrjen e informacioneve mbi lëvizjen e efektivëve. Pjestarë të fiseve “Bajri” dhe “Lici” u shoqëruan, ndërsa u lanë të lirë pas marrjes në pyetje.
“Mbështetur nga shërbimet operacionale dhe ato të Forcës së Posaçme “Shqiponja”, strukturat hetimore të DVP Shkodër kanë çmontuar dhe sekuestruar 21 kamera të lidhura nëpërmjet celularit, nga të cilat 8 të instaluara në vende dhe sheshe publike, në aksin rrugor nga rrethrotullimi “5 Heronjtë” deri tek rrethrrotullimi i parë i bypassit të Shkodrës, ndërsa 13 të tjera të instaluara në aksin rrugor nga rrethrrotullimi “5 Heronjtë” deri te rrethrrotullimi i Dobraçit. Kamerat e sekuestruara ishin vendosur pa lejen përkatëse të organeve kompetente. Vendosja e tyre është në kundërshtim me Ligjin 9887, datë 10.03.2008 “Mbrojtja e të dhënave personale” dhe përbën veprën penale “Ndërhyrje të padrejta në jetën private”, që parashikohet nga neni 121 i Kodit Penal”, thuhej në njoftim.
Nën orbitën dhe survejimin e mirëfilltë të krimit, të pashqetësuar nga drejtësia dhe forcat e rendit përveç kryeqendrës së Veriut është edhe një tjetër qytet problematik për dinamikën e ngjarjeve që ka prodhuar në raport me bandat. Qyteti bregdetar i Vlorës sipas rezultateve të fazës së tretë të operacionit “Fijet”, rezulton se monitorohej gjithashtu me kamera.
Të paktën 16 prej tyre janë çmontuar nga policia më herët dhe që ishin të shtrira në një perimetër të gjerë mes 5 lagjeve kryesore, të cilat herë pas here shfaqen në lajmet e kronikës së zezë.
Kamerat e instaluara në lagjet “Uji i Ftohtë”, “1 Maji”, “24 Maji”, “Lirim” dhe “Hajro Çakërri” duket se i kanë dhënë akses të plotë grupeve kriminale që i kontrollojnë, për të parë se kush hyn apo del nga qyteti dhe për të ruajtur supermacinë mbi kundërshtarët.
