Katër ditë pasi Gjykata Kushtetuese mbylli hesapet për çështjen e mandatit të ministres së Jashtme Olta Xhaçka, duke rrëzuar dy kërkesat e Partisë Demokratike për shkarkimin e saj si deputete, në godinën e organit të drejtësisë ka zbarkuar ambasadorja amerikane Yuri Kim.
Ndalesa e Kim vjen edhe pas zgjedhjes së anëtares së 9 të këtij institucioni, Holta Zaçaj. Me betimin saj u plotësua pas disa vitesh në kolaps prej reformës në drejtësi, Gjykata Kushtetuese.
Teksa arsyet hipotetike për vizitën nuk mungojnë, pasi në distancë ka pasur në dy muajt e fundit edhe një përplasje verbale midis diplomates së SHBA-ve dhe ministres Xhaçka, pasi MEPJ i “tregoi derën” duke bërë publik njoftimin e DASH për zëvendësimin teksa Kim përplasej me kryeministrin Rama për kreun e SPAK, ende është e paqartë përse ambasadorja i është drejtuar Kushtetueses.
Kjo gjykatë me shumicë votash vendosi të hënën që çështja e shkarkimit të Olta Xhaçkës si deputete t’i rikthehej Kuvendit, duke e detyruar institucionin që ta depozitojë sërish në këtë gjykatë.
“Për kërkimin e dytë, sipas objektit të kërkesës, që lidhet me konstatimin e papajtueshmërisë në ushtrimin e mandatit të deputetes Olta Xhaçka, gjykimi i çështjes duhet të pushohet, pasi për këtë kërkim do të duhet të shprehet më parë Kuvendi i Republikës së Shqipërisë”, thuhej në njoftimin e Gjykatës Kushtetuese.
Sakaq në një intervistë të pak ditëve më parë vetë Yuri Kim e shigjetoi Xhaçkën duke u shprehur se e ka pranuar postimin e MEPJ si shpjegim të qeverisë, por refuzoi të thoshte se e beson qëllimin, për të cilin Xhaçka tha se ishte për ta shpëtuar ambasadoren nga “akuzat dhe thashethemet” e Sali Berishës.
“Ministrja e jashtme ka qenë në atë post për ca kohë. E njohim mirë që nga koha e saj si Ministre e Mbrojtjes dhe kur qeveria e Shqipërisë nxjerr një shpjegim ne pranojmë fjalën e tyre”, tha ajo.
