Gjykata e Durrësit ka dhënë masën e sigurisë “Arrest në burg” për 46-vjeçarin Fredi Krasniqi, i cili u arrestua gjatë operacionit në Shijak, ku një vilë 4 katëshe ishte konvertuar në një “shtëpi bari”.
Përveç 444 rrënjëve të kanabisit në banesë u gjet edhe një arsenal armësh me 10 automatikë e granta, ndërsa në kërkim është shpallur edhe vëllai i 46-vjeçarit, Selman Krasniqi.
Sipas sistemit TIMS ai ndodhet në Itali, ndërsa dyshimet janë se kultivimi i kanabisit lidhet me grupet kriminale të zonës.
Ndërkohë, Fredi Krasniqi ka thënë para togave të zeza se armët e gjetura i zotëron prej vitit 1997 dhe se kanabisi nuk financohet nga grupet kriminale.
Sipas tij, ai ka ngritur “shtëpinë e barit” për të fituar disa para të shpejta që do t’i përdorte për të zgjidhur disa probleme shëndetësore.
“Armët i kam ruajtur që prej kohës së trazirave që përkon me vitet 97’ dhe i kam ruajtur që në atë periudhë brenda një muri të dyfishtë. Bimët narkotike i kam mbjellë për të përfituar para të shpejta për shkak të disa problemeve shëndetësore dhe kjo ishte e vetmja mënyrë për t’ia arritur. Kam nevojë për ndërhyrje kirurgjikale dhe nuk mund ta përballoj koston në formë tjetër. Çdo impiant që është vendosur në shtëpi, është bere nga unë dhe nuk ka financuar asnjë grup kriminal”, ka dëshmuar Fredi Krasniqi.
