Dy shqiptarë të tjerë kanë përfunduar pas hekurave në Britaninë e Madhe, teksa në një banesë në Bilborough gjatë një bastisje, policia gjeti armë, rroba të shtrenjta dhe kanabis me vlerë deri në 48,000 £ me vlerën e rrugës.
Urdhri për bastisje u ekzekutua në Tremayne Road, vetëm pas orës 8 të mëngjesit të 9 gushtit të vitit të kaluar, ndërsa dy shqiptarët dolën ditën e djeshme para Gjykatës së Lartë në Nottingham.
Kuzhinieri Klajdi Egra dhe miku i tij Aurel Shima u akuzuan për prodhimin e kanabisit, ndërsa Egra pranoi një akuzë shtesë për posedim të kanabisit me qëllim furnizimin.
Të dy djemtë u dënuan me burg pasi gjykatësi dëgjoi se si kontrolli i shtëpisë me katër dhoma gjumi, e shtrirë në tre kate, pa policinë të zbulonte kanabis të tharë dhe 57 bimë në proces rritjeje.
26-vjeçari Egra, i cili ishte ligjërisht në Britani me leje të përkohshme qëndrimi, kishte rroba të shtrenjta, një thikë dhe një makinë në pronësi. Oficeri sekuestroi gjithashtu një thikë flutur, dhe një iPhone në pjesën e pasme të shtratit dhe një faturë për pajisje hidroponike.
Gjurma e gishtit të Egrës ishte gjithashtu në një qese me kanabis të mbyllur me vakum. Në telefonin e tij kishte video të dërguara dhe të marra të bimëve të kanabisit përmes WhatsApp-it dhe mesazhe, në shqip, të cilat i referoheshin “barit”. Në makinë u zbuluan tre thasë me kanabis të mbyllura me vakum.
Sakaq, avokatja tha për Shimën se klienti i saj mbërriti në këtë vend 20 ditë para arrestimit të tij. “Ai erdhi këtu ilegalisht dhe i tha policisë se udhëtoi me gomone”, tha ajo.
25 vjeçari ka qëndruar në një “hotel imigracioni” në Luton, ndërsa më pas shkoi të jetonte me kushëririn e tij. Ai udhëtoi nga Londra në Nottingham dhe në adresën në Bilborough ndodhej prej katër ditësh me shokun e tij të vjetër të shkollës, Egra.
Shimës iu premtuan para për t’u kujdesur për bimët nga një individ që nuk ishte i pranishëm kur mbërriti policia.
Ndërkohë, gjykatësi William Harbage tha se shtëpia po përdorej për prodhimin e kanabisit në një “shkallë komerciale”.
“Ishin dy makina, kishte ushqim në frigorifer, njerëzit në atë shtëpi po kujdeseshin për ato bimë dhe ishin të përfshirë në kultivim. Kishte 57 bimë të reja. Ata ishin në gjendje të prodhonin kanabis me një vlerë në rrugë deri në 48,000 £. Kishte një qese tjetër të madhe me kanabis në shtëpi, qese koshi me mbetje – që tregon se kjo nuk ishte faza e parë që po realizohej”, tha ai.
Më tej gjyqtari shtoi: “Egra, gjurma jote e gishtit ishte në një nga ato çanta. Gjashtë telefona u gjetën – telefoni i Egrës përmbante mesazhe inkriminuese për një rritje të mëparshme. Kishte 800 £ cash, një thikë, një thikë flutur dhe një faturë për pajisje hidroponike me vlerë 3000 £ në shtëpi”.
Egra, tha gjyqtari, luajti një rol të rëndësishëm megjithëse drejtohej nga njerëz më të lartë në zinxhir dhe kishte një pritshmëri për përfitime të konsiderueshme financiare, në një kohë që ishte plotësisht i vetëdijshëm për shkallën e operacionit. Ai u dënua me tre vjet e gjysmë burg, ndërsa Shima do të vuajë 12 muaj heqje lirie, pasi gjyqtari tha se ai luante një rol më të vogël dhe funksion të kufizuar si “kopshtar”.