Dy shqiptarë janë arrestuar pasi policia ka bastisur një fabrikë të madhe kanabisi në Coventry të Britanisë së Madhe. Në shtëpinë e dytë të konvertuar në fermë kanabisi që u godit brenda një dite, oficerët zbuluan rreth 90 bimë në katin e sipërm që përdorej për rritjen e tyre, ndërsa vlerësohet se kanabisi i sekuestruar kap një vlerë prej 100,000 £.
Një numër oficerësh policie thyen derën gjatë bastisjes që ndodhi të mërkurën më 25 janar. Dy shqiptarët e arrestuar iu dorëzuan shërbimeve të imigracionit pasi u kapën në flagrancë në pronën në rrugën Gulson.
Policia në Coventry ka sekuestruar më shumë se 300,000 £ drogë brenda një jave si pjesë e një operacioni më të gjerë kundër grupeve të krimit të organizuar, duke shënjestruar një numër fermash kanabisi në Coventry.
Pjesa më e madhe e konfiskimeve erdhi nga një pronë e bastisur në Bramble Street, e kishte bimë me vlerë mbi 230,000 £ brenda.
Energjia elektrike vidhej në të dy fermat e kanabisit, gjë që sipas Rrjetit Kombëtar të Energjisë në Britani nënkuptonte një rrezik serioz zjarri që mund të vinte në rrezik jetën e banorëve dhe fqinjëve.
Inspektori Alex Heeley, nga Policia e Coventry-t, tha: “Si pjesë e Javës së Policimit të Lagjeve, ne kemi ekzekutuar këto urdhra dhe kemi mbyllur fabrikat e sofistikuara të drogës. Kultivimi i kanabisit dhe përdorimi i paligjshëm i pronave, jo vetëm që nxit tregun e drogës, por edhe krimin e mëtejshëm që dëmton komunitetet tona”.
Policia e Coventry tha se ka zbuluar mbi 20 ferma kanabisi në qytet vetëm në muajin e parë të 2023. Pothuajse gjysma e tyre janë zbuluar gjatë sulmeve ku bandat tentojnë të vjedhin kanabisin nga grupet rivale.
