Kryeministri Edi Rama shprehu qëndrimin kundër kërkesës së opozitës për komision hetimor parlamentar lidhur me dosjen amerikane në ngarkim të Charls McGonigal dhe lidhjet e këtij të fundit me vetë kreun e qeverisë shqiptare.
Në një prononcim për gazetarët pas përfundimit të mbledhjes me drejtuesit politik të PS-së në qarqe, teksa u pyet nëse do të pranojë ngritjen e një komisioni hetimor për çështjen, Rama tha: Cila çështje?! Është hetuar nga drejtësia amerikane që ka dalë në kolizione. Çfarë do hetohet?! Ka një drejtësi në Amerikë dhe ka gjykata”.
Rama mohoi se të dhënat për çështjen Muzin i janë kaluar ish-zyrtarit të FBI-së në Nju Jork McGonigal, nga zyra e tij.
“Përfundimi i hetimit dhe nisja e fazës tjetër kur hetuesit amerikanë kanë dorëzuar dosjen, s’ka asgjë nga kjo që thoni ju. Aty s’përmendet një gjë e tillë’ aty thuhet ca thotë njëri dhe tjetri. Vetë hetuesit thonë që hetimet kanë përfunduar dhe ka një të akuzuar për konflikt interesi”, tha ai.
Megjithatë, sipas akt-akuzës së autoriteteve gjyqësore në Uashington, McGonigal, më 25 NJëntor 2017, disa ditë pas një takimi me Ramës, ka iniciuar hetimin në SHBA ndaj lobistit të PD-së Nick Muzin.
Më 4 janar 2018, sipas akt-akuzës, McGonigal mori informacion për lobistin amerikan nga Agron Neza – i cili në padi identifikohet si “Personi A” – dhe të nesërmen ia dërgoi informacionin një agjenti tjetër të zyrës së FBI-së në Nju Jork.
Atë vjeshtë, po gjithnjë sipas hetimeve amerikane, McGonigal mori nga Neza të paktën 125 mijë dollarë.
Rama mohoi edhe lidhjet e ngushta me Agron Nezën. “Për shokun nga Tropoja, unë e kam njohur nga takimi me zyrtarin amerikan dhe s’kam pasur asnjë lidhje tjetër. Fola për zotin Agron që vjen nga Lëvizja Demokratike i afërt me Azem Hajdarin dhe fis me Benik Mustafjan, njerëz të nderuar, por s’e kam njohur asnjëherë më parë, e kam takuar vetëm në takimin me zyrtarin e lartë amerikan”.
Ndërsa për paratë që mori ish-zyrtari i FBI nga Neza, Rama foli për një borxh. “…Drejtësia amerikane ka ngritur akuzë për konflikt interesi për marrjen e një borxhi nga një shok nga Tropoja…”.
Për Dorian Duçkën, që në akt-padi përmendet si “Personi B”, Rama tha se ka qenë zëvendësministër dhe “ka punuar për një farë kohe pa pagesë” për të.
Kryeministri ndryshoi qëndrim në lidhje me Charls McGonigal. Teksa më herët theksonte pa hezitim se ai është “miku i tij”, tanimë shprehet ndryshe.
“Kam folur që ka qenë një mik në kuptimin që e kam takuar disa herë, por jo që kam kaluar jetën me të”, tha Rama këtë të Mërkurë.
