Ish-zyrtari i lartë i FBI-së Charles McGonigal, i arrestuar nga autoritete amerikane, përveç lidhjeve të tij me kryeministrin Edi Rama rezulton të jetë dekoruar nga kryebashkiaku socialist i Tropojës.
Në Shtator 2021, ai ka marrë medaljen “Mirënjohja e Tropojës”. Në ceremoni, siç ka zbuluar asokohe kryebashkiaku i Tropojës Rexh Byberi, përmes një postimi në rrjetet sociale, ishte dhe Damian Gjiknuri, si dhe Agron Neza.
Ky i fundit, në dosjen amerikane përmendet si “Personi A” dhe është pikërisht njeriu që i ka dhënë McGonigal 225 mijë dollarë.
Më 5 tetor 2017, “jashtë një restoranti, në një makinë të parkuar në Nju Jork, McGonigal mori afro 80 mijë dollarë kesh nga Personi A. Po atë vjeshtë ai mori edhe dy pagesa të tjera nga Personi A në shumat 80 mijë dollarë dhe 65 mijë dollarë në rezidencën e banorit A. McGonigal i la të kuptohej Personit A se paratë do t’ia kthente”, thuhet në akt-padi.
McGonigal akuzohet se ka marrë 225 mijë dollarë nga një ish-punonjës i shërbimeve sekrete të Shqipërisë dhe ka zhvilluar një sërë takimesh me biznesmenë dhe politikanë në Shqipëri, Kosovë dhe Bosnje, por pa i raportuar ato sipas rregullave.
Akt-padia tjetër ndaj ish-zyrtarit të lartë të FBI-së ka lidhje me ndihmën për oligarkun rus, Oleg Deripaska, në shkelje të sanksioneve amerikane.
