Prej orës 14:00 në Presidencë ka nisur mbledhja e Këshillit të Sigurimit Kombëtar, e thirrur nga Kreu i Shtetit Bajram Begaj në zbatim të detyrimeve kushtetuese dhe ligjore.
Ndër të parët që i është bashkuar mbledhjes ishte kreu i qeverisë Edi Rama, ndërsa të pranishëm janë edhe guvernatori i Bankës së Shqipërisë, Gent Sejko, kreu i SHISH, Oljan Kanushi, si edhe ministrat e kabinetit qeverisës.
Në mbledhje nuk mungojnë as shefi i Forcave të Armatosura, Arben Kingji dhe kreu i Policisë së Shtetit, Muhamet Rrumbullaku, ndërsa nga opozita i vetmi pjesëmarrës është deputeti i PD dhe anëtar i Komisionit të Sigurisë, Ferdinand Xhaferraj.
Gjatë mbledhjes pritet të analizohen prioritetet për vitin 2023, ndërsa Presidenti kërkon që të informohet me detaje rreth gjendjes aktuale të Sigurisë Kombëtare në vendin tonë.
“Viti që lamë pas, i vështirë dhe sfidues për sigurinë kombëtare. Sulmi kibernetik shkaktoi probleme në infrastrukturat dixhitale. Në aspektin rajonal, përpjekje nga shtete me interesa jomiqësore për frenimin euroatlantik të tij. Shqipëria në krah të Kosovës për ruajtjen e paprekshëmrisë dhe integritetit territorial të saj. Agresioni i paligjshëm i Rusisë ndaj Ukrainës ka shkaktuar krizën më të madhe të sigurisë në hapësirën euro-atlantike. Efektet e këtij agresioni u shoqëruan me rritje të konsiderueshme çmimesh në sektorin ushqimor dhe të energjisë të cilat kanë shtrenjtuar dhe vështirësuar jetën e qytetarëve. Angazhimi gjithpërfshirës institucional për të siguruar bashkërendimin dhe përdorimin efikas të burimeve kombëtare në funksion të sigurisë, lirisë dhe mirëqenies”, mësohet të jetë shprehur Begaj në nisje të mbledhjes.
