Basketbolli i femrave në Shqipëri ka parë mbrëmjen e djeshme një nga finalet më dramatike të historisë, teksa vetëm një pikë i kanë dhënë trofeun e Kupës në sezonin 2022-2023, vajzave të Flamurtarit përballë rivaleve të Partizanit.
Me rezultatin final 74-73, përplasja e dy ekipeve më të forta të kampionatit shqiptar në pallatin e sportit “Dhimitraq Goga” ka lënë shije pozitive për spektaklin e dhuruar, por ka ngritur edhe dyshime për mënyrën e gjykimit.
Shpallja fituese e vajzave të Flamurtarit në frymën e fundit dhe dështimi i Partizanit për të shndërruar në kosh aksionin final, pasi kishin dominuar të gjithë sfidën ka shtuar edhe më shumë pikëpyetjet mbi rezultatin.
Ashtu siç edhe e tregon rezultati përballja ishte shumë e luftuar, por ishte Partizani që e nisi vrullshëm, duke shënuar disa pikë radhazi dhe duke vendosur diktatin në lojë.
Entuziazmi i vajzave nga kryeqyteti bëri që 10- minutëshi i parë të mbyllej me 13 pikë avantazh, me shifrat në tabelë 26-13.
Edhe në periodën e dytë, Partizani e mbajti avantazhin, por vlonjatet u “zgjuan” duke shkurtuar diferencat me 4 pikë dhe dy ekipet shkuan në pushim me rezultatin 38-34.
Pas pushimit loja u udhëhoq sërish nga Partizani por me rezultat shumë të ngushtë, ndërsa nuk mungoi agresiviteti, por edhe gabimet individuale të vajzave nga kryeqyteti që i dhanë shtysë përmbysjes nga Flamurtari.
Sakaq, tek stoli i Partizanit lojtaret dhe trajnerja Eliverta Bujari kanë pasur pretendime për gabime te gjyqtarja. Teknikja e të kuqve pretendoi për një pushim të mohuar, kur duheshin vetëm disa sekonda, por gjyqtarët pretenduan se loja kishte filluar në momentin që trajnerja e kuqe kërkoi pushimin.
Polemikat në fund të sfidës ndikuan që të shtyhej edhe festa e Kupës për disa minuta. Gjykimet në sportin e basketbollit janë shoqëruar gjithmonë me kontestime dhe gabime të rënda të arbitrave.
Bie në sy që ekipet e sulmuara nga arbitrimi dhe federata janë ato të traditës si Tirana, Teuta, Partizani dhe Dinamo. Keq-arbitrimi me dashje vihet re çdo javë në parket edhe te ekipet e moshave ku federata i ka paracaktuar fituesit.
