Grupi i Plarent Dervishajt po planifikonte një atentat të dytë ndaj Aleksandër Lahos të njohur si Rumi, pasi dështoi ta ekzekutonte në 1 Nëntor të vitit 2019.
Sipas disa raportimeve mediatike, kjo ishte e reja nga çështja për atentatin ndaj Aleksandër Lahos dhe ish-prokurorit Arjan Ndoja, që u zbulua nga prokuroria në seancën gjyqësore të kësaj të Shtunë.
Lidhur me këtë u pyet pas seancës një prej avokatëve të pesë të arrestuarve, ndaj të cilëve u vendos nga GJKKO vijimi i masës së arrestit me burg. Në përgjigje të interesit të gazetarëve, avokati tha se “sapo kemi firmosur një tjetër deklaratë që s’mund të bëjmë publike asnjë fakt që u diskutua në sallën e gjyqit”.
Ndërkohë, mësohet edhe emri i personit të katërt të shpallur në kërkim. Ai është Dritan Shkëmbi, djali i një ish-punonjësi policie.
Në kërkim për rastin janë dhe Plarent Dervishaj, Julian Meçaj dhe Ramazan Rraja, nipi i deputetit Rahman Raja.
Këtë të Shtunë, GJKKO la në qeli 5 të arrestuarit e aksionit të koduar “Komploti”: Bashkim Haxhiaj; 54 vjeç; Marsel Deçka; 38 vjeç; Kili Nerjaku alias Genti Ndërjaku, 40 vjeç; të tre banues në Durrës; si dhe Endrit Sinani, 29 vjeç dhe Juljan Pjetri, 45 vjeç, të dy banues në Tiranë.
Për atentatin ku u ekzekutua shoferi i ish-prokurorit Ndoja, po gjykohen në Gjykatën e Posaçme Redjan Rraja dhe Artiol Halilaj, të dy pas hekurave, nën masën e arrestit me burg.
Personat e vënë në pranga dhe të shpallur në kërkim akuzohen si të implikuar në atentatin e ndodhur më 1 Nëntor 2019 te mbikalimi Shkozetit. Në atë atentat, u plagosën ish-prokurori Arjan Ndoja dhe Aleksandër Laho – i njohur si “Rrumi”, ndërsa mbeti i vrarë Andi Maloku, shoferi personal i ish-prokurorit të Durrësit.
Plarent Dervishaj akuzohet nga prokuroria si organizator dhe urdhërues i atentatit te mbikalimi i Shkozetit. Dyshohet se mes tij dhe Aleksandër Llahos, kishte përplasje. Konflikti mes palëve dyshohet se u agravua pas atentatit që iu bë Dervishajt në Durrës në vitin 2019, kur makina me të cilën lëvizte u qëllua me armë zjarri.
