Pas emërimit në krye të Prokurorisë së Posaçme, Altin Dumani në javët e para të vitit të ri 2023 vijon takimet e rëndësishme me krerët më të lartë të institucioneve në vendin tonë.
Ditën e sotme, Dumani ka pritur në ambientet e SPAK-ut kryetarin e Kontrollit të Lartë të Shtetit, Arben Shehun me të cilin diskutoi mbi ndërveprimin institucional edhe gjatë procesit të auditimit nëpërmjet shkëmbimit të informacioneve apo praktikave të konsideruara në shkelje të ligjit.
Të dy drejtuesit, shprehën vullnetin e tyre për intensifikimin e mëtejshëm të marrëdhënieve të ndërsjella institucionale si dhe të rritjes së komunikimit të vazhdueshëm në identifikimin dhe përcjelljen e rasteve të korrupsionit dhe abuzimeve me qëllim parandalimin në kohë të këtyre fenomeneve. Gjithashtu Arben Shehu uroi Dumanin për emërimin e tij në detyrën e Drejtuesit të Prokurorisë së Posaçme.
Altin Dumani më 16 dhjetor u zgjodh në krye të SPAK-ut:
Këshilli i Lartë i Prokurorisë ka zgjedhur më 16 dhjetor 2022 prokurorin Altin Dumani me 5 vota pro si kreun e ri të Prokurorisë së Posaçme Antikorrupsion (SPAK). Në garë për postin ishin kandidatë tre prokurorët: Altin Dumani, Adnan Xholi dhe Edvin Kondili. Dy rivalët e Dumanit morën respektivisht nga 1 dhe 4 vota.
Altin Dumani do të pasojë në detyrë kreun aktual të SPAK, Arben Kraja. Ajo çka merr vëmendjen përveç emrit të drejtuesit të ri të SPAK, janë dosjet “e nxehta” që ai do të marrë përsipër për të hetuar në mandatin 3 vjeçar që përcakton Kushtetuta.
Aktualisht Prokuroria e Posaçme po zhvillon hetime për disa nga aferat më të mëdha korruptive ku është përfshirë qeveria, që shtrihen nga Shëndetësia te Inceneratorët e deri te pastrimi i parave përmes sektorit të ndërtimit dhe tregut të pasurive të paluajtshme në Tiranë.
