Tre persona, mes tyre një ish-juristi i hipotekës së Durrësit janë arrestuar nga policia e Durrësit për veprat penale “Shpërdorimi i detyrës” dhe “Falsifikimi i dokumenteve”.
Ata akuzohen se i morën 5000 m² tokë një personi, duke e përvetësuar dhe regjistruar në hipotekë si të tyren nëpërmjet dokumenteve të falsifikuara.
Ndaj tyre, Gjykata e Durrësit ka caktuar masën e sigurisë “Arrest në burg”, me kërkesë të prokurorisë. Masë që ekzekutua nga policia.
Aksioni
Burme zyrtare nga policia e Durrësit bënë me dije këtë të Mërkurë se aksioni i koduar “Kthimi” u krye nga specialistët për Hetimin e Krimeve Ekonomike dhe Financiare “bazuar dhe në inteligjencën informative, pas një hetimi disamujor me metoda proaktive, në bashkëpunim me Prokurorinë pranë Gjykatës së Rrethit Gjyqesor Durrës”.
Në pranga u vunë:
- Artur Isaku 60 vjeç, ish-jurist i hipotekës së Durrësit;
- Zyber Dema 68 vjeç.
- Faik Ibrahimi 72 vjeç
Më 15.01.2023, gjykata ka caktuar për këta shtetas masat e sigurisë “Arrest në burg”, për veprat penale “Shpërdorimi i detyrës” dhe “Falsifikimi i dokumenteve”, kryer në bashkëpunim.
Sipas hetimeve, në bashkëpunim me njëri-tjetrin, duke përdorur dokumente të falsifikuara, ata i kanë marrë rreth 5000 m² tokë një shtetasi, të cilën e kanë përvetësuar dhe regjistruar në hipotekë si të tyren.
“Specialistët për Hetimin e Krimeve Ekonomike dhe Financiare të Drejtorisë Vendore të Policisë Durrës, në bashkëpunim me Prokurorinë, po vijojnë hetimet për dokumentimin e rasteve të tjera të kryera nga këta shtetas, si dhe për identifikimin dhe arrestimin e personave të tjerë të implikuar në këtë veprimtari kriminale”, mbyllet njoftimi i bluve.
