Nga Boldnews.al
Drejtori i Autoritetit Portual të Durrësit, Pirro Vengu, vijon të bëjë tendera çdo javë, pavarësisht se firma e cila ka marrë Portin e Durrësit ka filluar që të shesë apartamente dhe dyqane. Në mënyrë paradoksale, Vengu bën tendera për sinjalistikë, pastrim, mirëmbajtje 3 vjeçare, duke u dhënë firmave private miliona euro.
Por, nga ana tjetër, “shefja” e tij, Belinda Balluku, ka avancuar në negociatat me AMAAR, duke ndarë edhe “tortën”, ku të gjithë duket se po dalin të fituar. Duke mos qenë e projektit 2 miliardë euro, Vengu po përfiton çdo javë, duke vënë në “pjatë” para’ të cilat duket se do të hidhen në kosh.
Sipas dokumenteve që disponon BoldNews.al, Autoriteti Portual i Durrësit ka hapur ditët e fundit një tender me objekt “sigurimi i pasurisë”. Fondi limit për këtë tender është 24.23.829 lekë, teksa mësohet se bëhet fjalë për “shërbime të sigurimit të pronës”, “shërbime të sigurimit” dhe “shërbim për sigurimin në rast dëmi ose humbje”. Po çfarë do sigurohet?
Natyrisht, nisur edhe nga objekti do të sigurohet territori i Autoritetit Portual të Durrësit! Por, a nuk iu dha arabëve?
Natyrisht që po, pati Belinda Balluku avancoi me negociata dhe kontrata u miratua edhe në qeveri dhe Kuvend. Ndërkohë, që i pari që po përfiton është Vengu, emri i të cilit është lakuar edhe në disa procedura tenderuese të dyshimta muajt e kaluar, tendera të cilat janë denoncuar në vijimësi nga redaksia jonë.
Vengu ka hapur tenderin me vlerë 110 mijë euro të shqiptarëve për sinjalistikën e Portit të Durrësit, në një kohë që ia ka dhënë arabëve. Madje guxoi dhe hapi tender me vlerë 1.3 milionë euro për zgjerimin e Portit, por dikush i “tërhoqi veshin” dhe ai u tërhoq. Ka hapur dhe mbyllur edhe tenderin me vlerë 700 mijë euro për ta pastruar për tre vitet e ardhshme.
Autoriteti ka bërë tender për mirëmbajtjen e rrjetit hidrik të Portit për 3 vjet, tender për sistemet e sigurisë për 3 vjet, tender për mirëmbajtjen e infrastrukturës IT për 3 vjet e kështu me radhë. Të gjitha këto tendera i kanë bërë duke qenë në dijeni të plotë se pas tre muajsh, në mos më shpejtë, Porti nuk do të ekzistojë më.
Mësohet se në muajt e fundit Vengu ka tenderuar mbi 10 milionë euro, madje edhe vinça nga 3 milionë euro, që pas disa muajsh do shiten për skrap. Ose do t’i shiten privatit 10 herë më lirë nga kostoja e blerjes.
