Mbetet ende mister fati i 26-vjeçarit, Mateo Lika, i cili dyshohet se ra nga ura e Mbrostarit në Fier teksa po kthehej nga Gjermania me makinë.
Palombarët e RENEA-s e kaluan edhe ditën e djeshme në ujërat e Semanit, por sërish nuk gjetën asnjë gjurmë nga i riu.
Ndërkohë policia dhe prokuroria, kanë nisur hetime mbi ngjarjen e rëndë ndërsa RENEA dhe kërkuesit e lumit janë kthyer në banesa për të rifilluar sërish ditën e sotme kërkimet.
Por ajo që e ndërlikon edhe më tepër kërkimin për të riun, të zhdukur pa gjurmë tashmë që prej mëngjesit të së dielës, janë shirat që do të bien dhe frikës që Semani mund të bëhet i papërballueshëm për kërkimet e palombarëve.
Ndërkohë kanë nisur edhe dyshimet nëse i riu mund të jetë zhdukur vetë apo mund t’i ketë ndodhur ndonjë incident i papritur.
Si ndodhi ngjarja?
Mateo Lika, 26 vjeç, dyshohet se teksa drejtonte një makinë me qera, është përplasur me parmakët e Urës së Mbrostarit dhe më pas ka rënë në lumin e Semanit.
Duke qenë se nuk ka patur asnjë denoncim për persona të tjerë të zhdukur, mendohet se 26 vjeçari ka qenë i vetëm në makinë. Që prej ditës së djeshme, Mateo Lika nuk përgjigjet në telefon edhe pse familjarët e tij kanë tentuar ta kontaktojnë.
