Bordi i transparencës ka vendosur sot në mënyrë të papritur që të rrisë çmimin e karburanteve në vend.
Sipas vendimit të Bordit, një litër naftë do të tregtohet me 208 lekë për litër, nga 199 lekë që është sot, pra 9 lekë më shtrenjtë.
Çmimi i naftës në bursën ndërkombëtare është në “pikiatë” kurse bordi i ngritur nga kryeministri Edi Rama abuzon dhe tallet me xhepat e shqiptarëve duke bërë një rritje të pabesueshme në një kohë kur po përflitet për shkrirjen e tij.
Vendimi i Bordit vjen në një kohë që nafta në Bursa është në nivelet më të ulëta nga tetori i vitit 2021. Në atë kohë në vend, një litër naftë tregtohej mesatarisht me 174.5 lekë për litër sipas të dhënave të INSTAT, ndërsa sot është 33 lekë më shtrenjtë, ose 16% më shtrenjtë.
Që prej marsit të vitit 2022 çmimet tavan të naftës vendosen nga Bordi i Transparencës, i krijuar nga qeveria me synimin për të kontrolluar rritjen e fortë të karburanteve që erdhi pas sulmit të Rusisë ndaj Ukrainës.
Por, deri tani ndërhyrjen e Bordit vetëm sa kanë mbajtur lart çmimin. Operatorët e tregut pohojnë se nëse Bordi nuk do të ndërhynte, çmimet do të ishin të paktën 5% më lirë, pasi kompanitë do të ishin fleksibël të merrnin vetë përsipër rrezikun dhe të blinin më shumë sasi kur çmimi të ishte më i lirë në tregje, ndërsa tani janë të detyruar të bëjnë blerje në baza ditore për shkak të ndërhyrjeve të Borit.
ÇMIMI ME PAKICË:
Nafta 208 Lekë/litër
Benzina 189 Lekë/litër
Gazi 71 Lekë/litër
ÇMIMI ME SHUMICË:
Nafta 196 Lekë/litër
Benzina 177 Lekë/litër
Gazi 59 Lekë/litër
Cmimet do te ndryshojne sot ne oren 18:00. Kujtojmë që opozita ka kërkuar “shkrihen” në mënyrë urgjente të bordeve të cilat etiketohen si “komuniste” pasi abuzojnë me çmimet në dëm të xhepave të qytetarëve.
