Analisti Fatos Lubonja komentuar deklaratën e ministrit britanik i cili foli për ndalimin e shqiptarëve dhe largimin e tyre menjëherë nga vendi e cila bëri bujë dhe pati një përgjigje edhe nga qeveria shqiptare.
Lubonja deklaroi se situata është e thellë dhe se qeveria britanike po e trajton me një lloj “cektësie” duke sugjeruar se mund të ketë observime në terren për të kuptuar nga buron krimi.
Sakaq, ai foli edhe për situatën në opozitë, teksa tha se janë në presion të madh në luftën kundër mazhorancës, ndërsa shtoi se po përdoren disa individë që nuk janë më opozitë por që mund të bëjnë dëme duke iu referuar grupit të Alibeajt.
Lubonja deklaroi më tej se Alibeaj është një “falsifikator”, i cili sipas tij po nëpërkëmb drejtësinë për shkak të interesave apo inateve personale, duke treguar një papërgjegjshmëri të madhe juridike e morale.
“Unë e shikoj pak më thellë këtë gjë, me një vështrim kritik, qoftë edhe për britanikët, por edhe për qeverinë shqiptare. Vështrimi kritik ndaj qeverisë britanike vjen për një lloj cektësie në trajtimin e çështjes, kohë më parë kur SHBA ka pasur probleme me krimin në Itali dërgonte ekspertë për të kuptuar se çfarë ndodhte atje. Ata mund të bëjnë një përpjekje serioze duke ardhur në Shqipëri për të kuptuar nga e ka origjinën ky krim, ne e dimë që burimi është qeveria e lidhur me krimin. Puna që ka dhe shqiptarë të ndershëm nuk mund të na bëjë të mos shohim problemin, edhe të ndershmit që ikin janë problem për ne sepse duam që ata të qëndrojnë. Duhet të reflektojmë për këtë. Nuk mund të mohohet se numri i shqiptarëve që merren me krim në botë është shumë i madh me atë të popullsisë. Ne bëjmë sikur nuk e shikojmë sepse qeverisë i duhet krimi, bën edhe amnisti fiskale për të pastruar paratë e krimit”, tha Lubonja për “News 24”.
“Njerëzit nuk janë aq mendjelehtë, opozita është në një presion të madh përçarës nga lufta që ka me mazhorancën me Edi Ramën në krye që është përpjekur për t’i prerë krahët. Përpjekjet për rimëkëmbje ndeshen me një proces të rrezikshëm, opozita në një mënyrë mund të përjashtohet edhe nga zgjedhjet me zvarritjen që po i bën gjykata për vulën dhe kush ka të drejtën për të qenë ligjërisht në zyrat e PD. Po përdoren disa individë që nuk janë më opozitë por që mund të bëjnë dëme. Është gjëja më anormale nga ana e gjykatave që lënë vendin pa opozitë, kuptohet që janë të kapura. Nuk ka shans të bësh drejtësi dhe të thuash që asambleja e Berishës qenka e paligjshme dhe ajo e Bashës është. Gjykata është e ndarë mes asaj që quhet koshienca juridike dhe presionet e ndryshme që kanë këta individë nga pushteti. Është e qartë që sa më shumë të zgjasë kjo punë aq më mirë i bën atyre që i kanë vendosur këta gjykatës me vettingun selektiv”, shtoi ai.
“Ky është një falsifikator, që në ditën kur nuk ka pranuar asamblenë e parë, nuk ka dashur të shohë as emrat apo firmat e anëtarëve të PD-së, nuk do të shohë as rezultatin e zgjedhjeve të 6 marsit, dhe që ai është një minorancë, dhe se kanë të drejtë ta shkarkojnë. Alibeaj ka qenë dhe ministër drejtësie dhe e nëpërkëmb këtë për ambiciet apo inatet personale, quaje çfarë të duash. Tregon një papërgjegjshmëri shumë të madhe, juridike e morale, sepse kjo punë çon ujë në mullirin e Ramës”, u shpreh më tej analisti.
