Nga Boldnews.al
Kur Enkel Musaj u emërua në krye të Autoritetit Kombëtar të Ushqimit për Tiranën, vitin e kaluar, për shumëkënd që e njihte karrierën e tij me dritë-hije, u duk e habitshme që ai u rikthye në pozicione të rëndësishme drejtuese.
Musaj nisi karrierën e tij si oficer Policie para se Edi Rama të merrte pushtetin. Pasi socialistët erdhën në pushtet, Enkel Musaj zhveshi uniformën blu dhe u bë pjesë e administratës së lartë shtetërore.
Në vitin 2016, ai arriti në pozicionin e lakmuar të Drejtorit të Hetimit në Drejtorinë e Përgjithshme të Tatimeve.
Madje, me një shkresë të drejtoreshës së përgjithshme të Tatimeve të asaj kohe, Vasilika Vjero, Enkel Musaj ngarkohet me detyrën delikate për të pasur akses të plotë dhe për të trajtuar dokumentat me informacion të klasifikuar “Sekret Shtetëror”.
Sipas dokumentit që mban datën 10 nëntor 2016, të siguruar nga “Boldnews.al”, rezulton se titullarja më e lartë e Tatimeve në atë kohë ka deleguar kompetencën e saj ekskluzive tek Enkel Musaj, duke e “autorizuar për marrjen, shpërndarjen e shkresave zyrtare hyrëse nëpërmjet protokollit të Drejtorisë së Përgjithshme të Tatimeve, të cilat lidhen me informacion e klasifikuar ‘Sekret Shtetëror’”.
Pra, bëhej fjalë për një akses të palimituar në të dhënat tejet konfidenciale, ku përfshihen jo vetëm informacione të hetimeve penale, por edhe ato që kanë interes të veçantë për Shtetin.
Ky autorizim e shndërronte Enkel Musajn në një prej personave më të rëndësishëm në administratës shtetërore shqiptare.
Por, çfarë ndodhi më pas?
Vetëm tre javë më vonë, rreth datës 25 nëntor 2016, Enkel Musaj shkarkohet nga detyra e Drejtorit të Hetimit në Drejtorinë e Përgjithshme të Tatimeve.
Pra, njeriu i super-vlerësuar tek ai institucion, i cili kishte akses të plotë në dokumenta të sigluar “Sekret Shtetëror”, largohet vetëm pak ditë pasi i ishte dhënë autorizimi i posaçëm.
Përvoja e deritanishme ka treguar se “ajo që ndodh brenda Tatimeve, mbetet Brenda Tatimeve”. Askush nuk di të thotë me siguri se çfarë ndodhi mes drejtoreshës së Tatimeve, Vasilika Vjero dhe vartësit të saj më të rëndësishëm, Enkel Musaj.
Dhe, natyrisht, deri më tani, askush më mirë sesa ata të dy e di të vërtetën e krisjes së raporteve, që përfunduan me largimin e Musajt nga pozicioni i lakmuar.
Megjithatë, ajo që dihet është fakti që Enkel Musaj u largua nga detyra njëkohësisht me shkarkimin e dy drejtorëve rajonalë të Tatimeve.
Disa kohë pas largimit nga administrata tatimore, Musaj emërohet Drejtor i Shërbimeve të Brendshme në Agjencinë e Zhvillimit Rural.
Largohet edhe nga ky institucion dhe për thuajse një vit qëndroi i paangazhuar në administratën publike.
Tashmë, prej fillimit të vitit 2022, Enkel Musaj është emëruar në pozicionin e Drejtorit Rajonal të Autoritetit Kombëtar të Ushqimit për kryeqytetin, megjithëse hijet e detyrave të mëparshme ende nuk janë davaritur.
