Këshilltari për Ekonominë në PD, Dorjan Teliti tha në emisionin “Stay Tuned” në MCN TV se gjatë bashkëpunimit me Lulzim Bashën, ka pasur raste kur ish-kreu i PD ia ka lënë “seen”.
Megjithatë Teliti e konsideroi mos kthimin e menjëhershëm të një përgjigjeje, një situatë normale mes dy bashkëpunëtorëve.
“Kam bashkëpunuar ngushtë me ish-kryetarin e PD, z.Basha. Kam qenë drejtori i tij i kabinetit, madje për një periudhë dy vjeçare. Ka pasur raste që ma ka lënë seen. Është përgjigjur të nesërmen, kur jemi takuar, por është normale. Ndodh edhe sot me bashkëpunëtor të tjerë”, tha ai.
Teliti tha se detyra e çdo demokrati është bashkimi i Partisë Demokratike.
Ai shtoi se sondazhet tregojnë pikët e opozitës janë në nivele maksimale, por duhet bashkimi që në 14 maj të ketë “një fitore spektakolare”.
“Ajo që më trishton është ajo që ndodh në PD, debati ynë i brendshëm. Unë dua të jem pjesë e bashkimit, zgjidhjes, jo e kritikave. Rëndësi ka të mos kryhen faje, se gabime do të kryhen. Më mërzit që ende s’kemi gjetur gjuhën tonë të brendshme. Ne duhet të merremi me kundërshtarin politik. Më mërzit fakti që harxhojmë energji me problematikat e brendshme, ndërkohë që në duhet të fokusohemi që debati ynë i brendshëm të mos na kthehet në barrë. Bashkimi është ajo që duan të tërë, mendime mund të ketë të ndryshme, por për bashkimin bien të gjithë dakord. Derisa të arrihet ky bashkim, edhe kjo mërzi do të ikë dhe do të na japë një adrenalinë të vendosim një marsh shtesë në fushatën elektorale. Është imperativ bashkimi, diçka e detyrueshme nëse duam të kemi shanse për fitore.
Detyra e çdo drejtuesi të lartë të PD është vetëm një, gjetja e gjuhës se bashkimit. Është imperative nëse duam të fitojmë një pjesë të numrit të madh të bashkive. Nuk jam nga ata që them arrijmë t’i fitojmë të 61-ta bashkitë, kjo është e pamundur. Por ju siguroj që në bazë të sondazheve dhe për faj të qeverisë dhe pakënaqësisë që ka krijuar, sot pikët tona si opozitë janë në nivele maksimale. Mjafton të lëmë mënjanë cic-mic-et tona të vogla, të gjejmë gjuhën e bashkimit. Nëse këto arrihen ju siguroj që rezultati i 14 majit do jetë spektakolar”, u shpreh.
