Nga Boldnews.al
Instituti i Ndërtimit, i drejtuar nga Artan Shkreli, nuk ka kohë për të kryer ekspertizën e kateve pa leje të godinës së Pëllumb Salillarit në zonën e “Liqenit të Thatë”, një akt i domosdoshëm për hetimin penal të nisur nga Prokuroria e Tiranës për “ndërtim të paligjshëm”.
Në një vizitë inspektuese të zhvilluar në shtator të vitit 2022, Ministri i Brendshëm, Bledi Çuçi, deklaroi se ishin evidentuar rreth 1200 mijë metra katrorë pa leje në një pallat që po ndërton kompania “Salillari”.
Në vijim të këtij konstatimi, Këshilli i Rregullimit të Territorit, nën drejtimin e kryeministrit Edi Rama, vendosi konfiskimin e pallatit të Salillarit, bazuar mbi një vendim qeveritar që ka ngjallur debate për ligjshmërinë e tij.
Ndërkohë, Policia e Tiranës referoi çështjen e Salillarit për hetime të mëtejshme në prokurorinë e kryeqytetit, nën dyshimet e kryerjes së veprës penale të “Ndërtimit të paligjshëm” për qëllime përfitimi.
Prokurorët kanë kërkuar kryerjen e ekspertizës teknike nga Instituti i Ndërtimit, për të pasur në dispozicion një dokument me vlerë ligjore dhe dokumentare mbi paligjshmërinë e kryer nga kompania Salillari.
Por, nga ana e Institutit të Ndërtimit kanë marrë një përgjigje refuzuese për kryerjen e ekspertizës.
“Boldnews.al” ka mësuar se Drejtori i Institutit të Ndërtimit, Artan Shkreli, ka informuar Prokurorinë e Tiranës se institucioni nuk ka ekspertë në dispozicion për t’iu përgjigjur kërkesës së hetimit penal.
Në një komunikim zyrtar, Shkreli deklaron se ekspertët e Institutit të Ndërtimit janë të angazhuar në grupe pune për kryerjen e akt-ekspertimeve të ndërtuara pa leje ose me shtesa të paligjshme.
Drejtuesi i Institutit të Ndërtimit deklaron më tej se, për shkak të fluksit të madh të punës, ekspertiza për katet pa leje të Salillarit nuk mund të kryhet më së paku deri në fund të janarit të këtij viti.
Dhe, në fund, Shkreli i sugjeron prokurorisë që të marrë ekspertë privatë, me qëllim që të mos vonohen në hetimin penal.
Në këto kushte, Prokuroria e Tiranës është detyruar të thërrasë ekspertë privatë, për të hartuar aktin kryesor për hetimin ndaj Pëllumb Salillarit dhe kompanisë së tij, “Salillari” shpk.
Tashmë priten rezultatet e aktit të ekspertimit Teknik, ndërkohë që godina e Salillarit në zonën e Liqenit të Thatë vijon të jetë me statusin e “konfiskuar”, sipas vendimit të Këshillit të Rregullimit të Territorit (KRRT).
