Klosi është lëkundur mbrëmjen e djeshme nga më shumë se tre lëkundje të shkallës 2.8 deri në 3.4 rihter.
Epiqendra e tërmetit ishte në Xibër, ndërkohë që lëkundjet janë ndjerë edhe në zonat të tjera të kësaj bashkie, duke krijuar panik tek banorët.
Më të frikësuar kanë qenë banorët e dëmtuar nga tërmeti i fuqishëm i vitit 2019. Këta familje vijojnë të jetojnë në çadra apo banesat gati të rrënuara.
Një prej tyre është edhe familja Hoxha nga fshati Bejn i Klosit. Kryefamiljari Mersim Hoxha tha se lëkundjet e mbrëmshme kanë krijuar frikë saqë ka lënë ambjentet e banesës dhe ka fjetur jashtë pranë mullarit të barit.
“Pasi ndjeva lëkundjen e parë të tërmetit mora gruan dhe dola në kasollen e barit dhe aty kam ndenjur gjithë natën, nuk kisha rrugë tjetër. Kanë qenë katër lëkundje që kemi ndjerë, shtëpia është e dëmtuar nga tërmeti i 2019, kemi marrë një shpërblim qesharak për shtëpinë e dëmtuar. Apeli im është të kem një shtëpi të vogël. Tërmeti nuk dihet se kur bije nuk të lajmëron. Prej tre vitesh kam jetuar në çadër por dhe ajo u gris”, është shprehur Hoxha.
