Qeveria socialiste prej prillit të vitit të shkuar ka vendosur të ecë përpara me idenë për të kaluar në Parlament një ligj për Amnistinë Fiskale, pavarësisht se nisma ka prodhuar kundërshtime të forta nga Komisioni Euopian, FMN dhe institucione të tjera me peshë.
E teksa kryeministri Rama ende nuk i ka detyruar të vetët që ta “zbresin” ligjin në Parlament, pasi socialistëve u mungon shumica e cilësuar prej 84 votash, duket se në mes të tyre ka nga ato figura që qëndrojnë kundër Amnistisë.
Një prej tyre që ka shprehur hapur qëndrimin e tij është ish-deputeti dhe eksperti i ekonomisë, Ervin Bushati.
Në argumenetet e tij kundër nisëmës së PS, Bushati thekson se amnistia nëse miratohet do t’i jepte oksigjen krimit të organizuar, duke formalizuar të ardhurat e tyre që aktualisht qarkullojnë ilegalisht në ekonomi.
“Amnistia fiskale, e kemi edhe si shoqëri ne që themi le t’i sjellin lekët këtu çunat problematikë. Forca e krimit jashtë është tek shpella e Susamit, hapu, mbyllu, po e mbylle Susamin këtu bie krimi jashtë. Se e dinë që s’do kenë bankë ku t’i çojnë. Problemi I atyre që i bëjnë në mënyrë problematike kanë paratë, kanë thyer ligjin, kjo është vendosur para 5 mijë vitesh me kodin e Hamurabit, po e kalove ligjin do dënohesh. Ata atje s’kanë ku t’i çojnë lekët, s’dinë ku t’i mbajnë, duan t’i sjellin këtu, sepse ky është një vend që mund t’i fusin si në bankë. Po u mbyll Susami këtu, dera e shpellës, nuk kanë mundësi ata. Prandaj është BE dhe SHBA kaq kundër këtij procesi“, tha Bushati në studion e Syri Tv.
